“Sosiedade Sivil Sei Lori Governu Ba Tribunal”

.

Husi: Agus dos Santos - Jornal Independente - Kuarta, 01 Juñu 2011

Dili- ONG lubuk ida iha tempu badak nia laran sei lori governu, liliu Minsteriu Justisa ba tribunal tamba meius resolve problema komunidade sira iha eis kolejiu Brimop, Perumnas, la Justu.

ONG sira ne’e haree katak atensaun governu ba komunidade eis Brimob konsidera hanesan kazu despezu obrigatoriu atu bele halo autodefeza ba kazu ne’e.

“Ami iha ona diskusaun no buka hela advogadu atu bele lori kazu ne’e ba tribunal,”Diretor Forum Tau Matan Joao Pequino hatete ba INDEPENDENTI horseik.

Joao dehan iha estadu no nasaun demokratiku ida ema hotu iha direitu atu asesu ba justisa no lialos, tamba ne’e nia parte hakarak ezije justisa ba komunidade sira.

“Sosiedade presiza advogado privadu ida hodi atende didiak problema ne’e antes ba tribunal,”Joao dehan.

Nia hatutan ONG ne’ebe dadaun ne’e involve hodi deskute asuntu ne’e mak ONG haburas Foundation, Rede Ba Rai, Lao Hamutuk, KSI, inklui FTM rasik no seluktan.

Tarjetu nebe sosiedade sivil sei planeia mak Ministeriu Justisa, liliu Diresaun Nasional Teras no Propiedade tamba informasaun dehan staff ministeriu nian balun hamosu dokumentu falsifikasaun barak no uza intimidasaun inklui terror atu populasaun sira tenke sai husi sira nia fatin.

.