Programa Merenda Eskolar Halo Estudante Moras

.

Husi: Agapito dos Santos - Jornal Independente - Segunda, 20 Juñu 2011

Dili- "Governu nia aihan husi programa apoiu merenda eskolar halo estudantes sira iha eskola Primaria ida iha Dili hetan moras,” director eskola hateten.

Rosa Auta Marcal da Cruz, diretora eskola primaria iha Manleuana, dehan inan ho aman estudante sira balun dala barak protesta kona-ba aihan ne’ebé fó ba sira nia oan sira, tanba sira nia oan nia kabun moras hafoin han hahan ne’ebé oferese liu husi programa merenda eskolar.

“Dala barak estudante sira hetan kabun moras, no inan ho aman estudante sira mai halo protesta maibe ami atu halo nusa? Ne’e (aihan ne’e) mai husi governu,” Rosa dehan ba INDEPENDENTE, sabadu (18/06).

Director la kohi hateten sai numeru estudante sira ne’ebé hetan kabun moras hafoin han hahan iha eskola.

Rosa mos husu ba governu atu troka aihan sira ne’ebé durante ne’e governu oferese.

“Diak liu merenda eskolar labele fó fos, mina no koto, maibé fó buat ruma ne’ebé hanesan; snack, susuben, paun, manu tolun, fore mungu,” nia dehan.

Diretora dehan ninia eskola iha estudante hamutuk 1008 no professor no profesora hamutuk 29, hasoru mos defikuldade sira seluk, hanesan iha deit sala 10 ba estudante sira, kadeira no meza la sufisiente, livru ba professor no profesora limitadu.

Problema ne’e difikuluta estudante sira iha prosesu apredijazen, kada sala akmula estudante nain 60 to’o 70, dehan Rosa.

“Durante ne’e estudante nain 4 to’o 5 tur hamutuk iha meza no kadeira ida,”tuir nia durante ne’e mos Profesor no profesora sira hanorin tuir deit sira nia hakarak tamba problema livru hodi hanorin mak limitadu,” nia dehan.

.