Ohin Loron Mundial Ba Labarik, Street Children Nakonu Iha Dili

.

Written by Domingos Silva - Wednesday, 01 June 2011

CJITL Flash, Loron 1 fulan Junho, nu'udar loron mundial ba labarik, iha Timor Leste porsentu Labarik Estrada ou Street Children kontinua nakonu iha Sidade Dili, hodi halao aktividade fa'an sasan iha estrada ninin.

Tuir Joao da Silva (10) ne’ebe fa’an iha estrada ninin hateten katak nia labele eskola hanesan labarik sira seluk tanba laiha ema atu tau matan ba nia.

"Hau fa’an sasan ne'e tanba hau nia aman rasik mate wainhira hau sei bebe"dehan Joao kuarta 01/6, iha Pantai Kelapa Dili.

Maske tuir lei trabalho mundial rasik la fo fatin ba labarik ho minoria atu sai trabalhador.

Labarik ne’e argumenta katak maske nia laran triste hodi hala’o atividade ida ne’e maibe tanba nia inan ne’ebe laiha servisu tanba ne'e nia iha hanoin ida hodi ajuda nia inan ne'ebe mak fa'an iha dalan ninin.

“Hau la eskola tanba ekonomia uma laran mak la permiti atu hau ba eskola, Hau nia apá mate wainhira hau sei ki’ik" informa Labarik ne'e ho Tristi.

Nune'e mos Maria Perreira(11) eskola iha Primaria No.5 Comoro ne'ebe mak lor-loron fa'an iha dalan ninin hateten fa'an ne'e Hakarak hetan osan hodi hola sasan atu nune'e bele hola buat balun ne'ebe mak presiza lori ba eskola hanesan lapizeira, kadernu, pasta.

Veronica Moniz nu’udar husu ba komisaun labarik no governu atu tau atensaun ba labarik sira ne’ebe kbi’it no moris iha dalan ninin hodi fa’an hanesan pulsa, sigaru no seluk-seluk tan.

“Sira labele koalia deit katak direitu labarik nian, Governu tenki tau matan ba labarik ne’ebe eskola e labarik ne’ebe la eskola tenki loke kursu ruma ba sira tanba sira mos iha direitu atu aprende”, katak Veronica.

Maske realidade labarik ne’ebe moris iha dalan ninin iha Timor Leste ho numeru bo’ot, problema labarik sira iha nasaun foun ne’e hanesan problema ba Futuru maibe Governu la tau atensaun ba problema ne'e.(Domingos da Silva/CJITL)

.