Ministru Infraestrutura Susesu Deit Taka Koak

.

Husi: Agus dos Santos - Jornal Independente - Kinta, 02 Juñu 2011

Dili - Estudante Universitariu konsidera Ministeriu Infraestrutura oras ne’e susesu deit ba programa taka Estrada kuak.

Mario da Silva, Estudante Universidade Nasional Timor-Leste Faculdade Ekonomia, hatete, programa infraestrutura nian barak maibe implementasaun minimu tebes tanba durante ne’e Ministeriu refere so taka no loke koak husi Estrada iha kapital Dili to’o Distritu sira seluk.

Maibe tuir nia, Governu tenki implementa planu ho diak atu nune’e dezenvolvimentu infraestrutura bele la’o ho diak,”dehan Mario, Semester Lima ne’e.

Tuir estudante UNTL Jorry hatete, prosesu dezenvolvimentu infraestrutura atu la’o diak, planu tenki diak, tamba tuir nia hare projetu no kompania durante ne’e, ida hadia tiha, depois tinan mai kompania ida mai sobu fali hodi hadia tan deit,dehan Jorry.

Alinde ne’e, Maubere Campus estudante UNTL, Siensia Administrasaun dehan realidade hatudu oras ne’e, dezenvolvimentu infraestrutura konsentra deit iha kapital Dili maibe baze sei minim liu .

Tuir nia hare mos katak, dezenvolvimentu ne’ebe governu ne’e hala’o liliu iha area infraestrutura, Estrada maioria taka no loke koak deit, seidauk iha planu ne’ebe foun hodi implementa hodi fo benefisiu ba povu kiik sira.

“Povu iha baze balun seidauk senti infrastrutura tanba Estrada ba sira seidauk tama to’o sira nia suku hodi fasilita sira mai asesu merkadu”.

.