Written by Isac da Conceicao - Radio Liberdade - Thursday, 16 June 2011
Radio, online – Membru Parlamentu Nasional husi bankada PSD Mario Viegas Carrascalão konsedera Korupsaun, Kolusaun no Nepotizmu (KKN) buras iha AMP nia laran tanba Primeiru Ministru Kay Rala Xanana Gusmao la forte foti medidas ba nia membru governu sira.
Carrascalão fo kestaun ne’e, relasiona ho informasaun mai husi Xefi governu Xanana dehan ninia ministru matan fuan naklosu ba osan no abuza halo KKN.
“Hau kuandu atu toma medidas ona ne’e, maibe dehan hau mak sai fali opozisaun diak liu hau hare husi parte seluk deit, dehan Carrascalão iha uma fukun Parlamentu Nasional (14/6) foin lalais ne’e.
Tuir Carrascalao, PM Xanana laos ema ida koruptor, maibe atu hola medidas mak mamar liu no husik hela ema halo nafatin. Husi parte Carrascalão nian sei la halimar ho ema sira hakarak naok osan povu nian no la fo perdaun.
Iha fatin hanesan, Deputada husi PD Getrudiz Moniz mos rekoinese membru governu iha balu mak la halo programa tuir aprezenta iha orsamentu jeral. Tuir nia mos iha mos indikasaun forte membru governu halo KKN.
“Ami sempre halo fizkalizasaun programa barak mak la lao no barak mos la iha kualidade. Ho rezultadu ne’e osan barak mak sai ba privadu,”Moniz lamenta.
Lia fuan hanesan mos husi Deputadu Inacio Moreira kestiona mak lia fuan PM Xanana nian dehan ninia ministru matan fuan naklosu ba osan.Tuir Inacio ne’e hanesan moe bo’ot ida. Diak liu ministru sira mak programa la lao no hetan kritika barak husi povu diak liu rai tiha pasta ministru nian ne’e.
“Hau mak iha sira (membru governu ) nia fatin sai tiha ona. Hau lakoi hau nia oin ne’e taka ho karau nia kulit. Ita ne’e ema iha moe,” friza Inacio.
.
7 comentários:
Dala barak no bebeik ita rona Deputado/a sira koalia kona ba KORUPSAUN iha Governo AMP nia laran. Liu ba kotuk ita mos rona dala barak no bebeik Deputdo/a sira koalia kona ba KORUPSAUN iha governo FRETILIN nia laran.
Deputado/a sira gosta koalia kona ba KORUPSAUN. Deputado/a sira lalais los temi lia fuan KORUPSAUN. Deputado/a sira liman fuan mamar hatudu ba ida ne'e ba no ida ne'e mai halo KORUPSAUN.
Eleisaun besik ona Deputado/a sira husi partido hirak ne'ebe forma Governo, mos gosta ona temi lia fuan KORUPSAUN.
Agora, povu Timor husu ba Deputado/a sira:
1. Kazu KORUPSAUN hira ona mak tuir Deputado/a sira nia resultadu fiskalizasaun ne'ebe komete erru, hatama ba prosesu LEGAL kompletu ho FACTUM no DATUM?
2. Husu Deputado/a sira hasai lista tuir FACTUM no DATUM hatudu ministerio ida-idak ne'ebe komete KORUPSAUN no ema ne'ebe involve iha KORUPSAUN? - Labele garganta deit.
3. Ema nain hira ona mak hatama ba KOMARKA tanba KAZU KORUPSAUN?
Ita gosta hakilar deit kona ba KORUPSAUN, mas la iha interese atu hatudu DATUM no FACTUM.
Ema sira agora hakilar maka'as kona ba KORUPSAUN, sira ne'e duni mak hetan oportunidade kaer ukun sei halo KORUPSAUN maka'as liu tan.
Diak liu-diak liu, buka didiak DATUM no FACTUM, hatama ba Komisaun Anti Korupsaun, hatama ba PDHJ, no publica sai ba publico, atu nune'e KAK no PDHJ investiga no prosesu tuir dalan LEGAL no povu Timor akonpanya kazu pur kazu.
Para ona ho HAKILAR lian mamuk ba KORUPSAUN, serbisu maka'as rekolya DATUM no FACTUM hatama ba prosesu LEGAL.
Hakoak.
Hau konkorda ho belun Bere Buti nia komentariu
Emi hirak ne naokten tanan-tanan. husi leten too kraik no kraik ba fali leten.
Atu Parlamentu ka Governu ka Prezidensial ka Partidu nebé deit.
Atu estadu ida ne nian ka estadu ida uluk nian ka estadu ida oinmai nian, sira tomak hanesan deit.
Ida la liu ida seluk. Mau-Kuarta dún Mau-Kinta, Mau-Kinta dún Bi-Sexta, Bi-Sexta dún MauBi-Sésé fali tan - fila ba fila mai hotu-hotu dún malu haleu raiklaran tomak la hotu deit.
Keta fiar ukun na'in sira tomak bainhira sira an rasik buka hatún malu. Bosok oioin deit atu manán emar Timor nia fiar. Bosok oioin deit hodi manán fatin. Sira ne tomak mak koalia iha kakorok-talin deit ka husi fatin nebé fali.
Hanesan aihan ida - iis dodok uain basuk hori nebé kedas ona! Dodok nebé ular mós la han!!
Hatama ba tribunál, hatama ba média, hatama ba lalehan, hatama ba infernu too ikus subar hotu iha sira nia imunidade. Leten kraik, kraik leten taka malu hanesan luhu matan ho nia kidun - metin los ata oan sira atu hafuhu ba laran mós la hetan anin iis ida. Too ikus la hatán buat ida ba emar Timor tomak.
Mandatu hotu ona sira tur hakmatek simu emar Timor nia pensaun bokur too mate nian. Tur haksolok sura rikusoin nebé naok no bosok nian. Tur malirin furak los lia ida la kona. Emar loro-loron baibain nian la hetan ida ne.
Rahun-diak boot tebes los mai naok emar Timor nia osan. Emar Timor mak lakon!
Ukun nain sira mak moris diak kalan loron anin hu'u leten too kraik, liur, laran malirin furak los. Emar loro-loron mak terus no tahan deit. Emar biar deit too ikus simu deit hanesan ne!
Moe? Ukun nain sira la moe? Moe tansá? Moe ba saida los? Naok no bosok mak diak liu. Tanba ida ne mak matenek ita simu ona husi tasi balun, husi rai laran, husi leten kraik sorin-sorin, husi nebé nian deit. Matenek diak ida ne, be ita simu ona mak ita tomak banati tuir. Ne lalika hakfodak, lalika moe fali maun/alin inan/feton sira. Hori otas hori uain ida ne mak beiala sira uluk hanorin ita.
Kulit ne mahar liu fali ona karau nian. Mahar liu elefante nian. Mahar liu fatuk, liu ai, liu besi, liu dok!
Timor leste nasaun ida foun no nurak e bele konsidera katak nasaun kiik no nia ema sira neébe mak iha nasaun nia laran bele koinese malu hahu husi kiik to sira nebe mak bot, hahu husi povo to'o ba lider sira e mos husi estrutura base to'o iha nivel estrutura alto,mas liafuan korupsaun temi hahu husi primeiro Governo e pior liutan Quarto Governo Konstitusional. Lifuan Korupsaun temi hodi defende sira nia-an atu atrai votos povo nia hodi hili sira para ou hetan kadeira iha Parlamento ou iha kargu Polítiko, maibe realidade saida mak akontese, dala barak ema matenek nain sira temi" Povo nia lia e Maromak nia lia" kuando atu besik elisaun halo kampana polítika, se imi vota ba ami,ami sei la tolera ema liman naruk sira ou alias koruptor sira, iha kampana polítika aktual primeiro ministro e Presidente da Partido CNRT iha Viqueque dehan semak foti kuarter sai, mas realidade saida mak mosu kuando povo fo fiar ba nia hodi lidera Governo AMP.hahu husi parlamento to iha Governo hodi toka no kanta muzika mesak furak deit, mas muzika ne'e laiha sentido ba realidade vida kada povo timor leste nia, e governo kria komisaun barak-barak atu minimiza aktividade ema liman lalais sira maibe realidade hatudu katak so ho lifuan falsu no liafuan midar hodi nune hatudu ba mundo seluk katak sira realisa duni promete nebe mak sira halo, maibe nee so ema matan delek sira mak bele fiar, tamba durante iha governasaun AMP nunka iha vontade Polítika nebe diak atu kombate korupsaun,hahu husi estrutura base to'o iha estrutura leten,exemplo kuando Governo anterior ou Governo Fretilin sira dehan katak iha korupsaun barak para atu reforma administrasaun no buat hotu maibe realidade reforma saida mak ita bele fiar" hasai quarta classe ida hatama quarta classe rua, xefi de posto tenke licenciatura mas realidade hasai quarta classe tempo portugues hatama segunda classe Indonesia nia ida ne'e mak reforma tuir Governasaun Xanana depois temi sira nia naran"AMP" Ami mesak Profisional deit"" Kria kampo de trabalho ou serbisu ba jovens sira maibe jovens kapasidade ladun sufciente sira haruka ba correia ba dehan nee serbisu mak ne'e!! ba hau diak liu povo sira hamutuk deklara ba sira katak deskansa ona selae osan mina timor nia bele hotu maibe desenvolvimentu nunka lao ho diak tamba governo sempre fo oportunidade ba liman naruk sira para fahe porsentu % e Parlamento nebe mak nia knar kontrolu knar Governo nia sai fali Porta voz Governo iha sira hanoin ne'e mak diak tamba sira hatama projeto barak,aprova osan barak para ita hetan % balun husi aprovasaun nee povo nia moris laiha buat ida..!!
Sira hotu2 mesak naokten, tantu AMP, tantu Fretilin. Sira hanesan deit. ita labele gava ida liu fali ida seluk.Governu konsitutional I = konsitutional II = konsitutional III = konsitutional IV mesak naokten hotu. Agora sira hadau malu se mak sei manan iha 2012 para atu naok barak liu tan !!!
Karik ema timor oan sai naokten hotu, entaun ita la iha direitu atu ukun rasik an. Los ka lae?
Timor oan laos ema naok ten mas ida rua ne'ebe uza sala nia poder hodi aproveita oportunidade, karik ita bele konta ho liman fuan,,!! ita hotu ho honestidade hateten ba sira, tamba timor oan hotu iha direitu e ita la defende ema ida,mas semak halo korupsaun presisa lori ba justisa e nune bele halo responsabilisa ba aktu nebe mak nia halo:::!!
Enviar um comentário