Lu-Olo: " FRETILIN Mahon Ba Povu"

.

Timor Post - Kinta, 02 Juñu 2011

Maliana - Prezidente Patidu FRETILIN Francisco Guterres Lu-Olo haklaken Partidu FRETILIN hanesan aihun ida fo mahon ba militantes sira iha baze hodi hein eleisaun jeral 2012.

“Ha’u hakarak responde iha imi hotu nia oin atu rona saida mak oras ne’e dadaun bosok ten sira sei mai bosok nafatin imi tamba atu hakat ba eleisaun jeral 2012, FRETILIN mak militante nia mahon,”hateten Lu-Olo iha konsolidasaun Partidu ne’ebe hala’o iha Sub Distritu Maliana, Distrito Bobonaro, Sabadu (28/5).

Nia dehan konsolidasaun ne’e tempu ida ba militante no simpatizantes FRETILIN atu iha korazen hodi hadi’a an atu lao ba oin iha eleisaun jeral.

“Hau husu ba Camarada sira atu prepara ita nia an para fo vida ba ita nia partidu ne’e liu husi prosesu demokratiku ne’ebe mak iha partidu nia laran,”Lu-Olo sujere.

Iha fatin hanesan, Sekretariu Jeral Adjuntu FRETILIN Jose Reis tenik ema barak sei konfundi konsolidasaun no kampanha tanba konsolidasaun halibur hamutuk halo festa.

“Ema balun konfundi ho ita nia konsolidasaun no kampanha tamba ema barak dehan ita tama ona iha kampana, lae, ne’e konsolidasaun tanba rejultadu ita nia servisu,”nia afirma.

Nia husu ba militante sira labele konfunde konsolidasaun ho kampana eleitoral, Tuir Jose Reis kampana ne’e seidauk to’o maibe sira prepara hela atu tama ba kampana konsolidasaun.

Iha konsolidasaun ne’e, responsavel husi partidu politiku tolu mak hanesan, PUN, PD, no PSD halo deklarasaun politika hodi lori militante husi partidu tolu ne’e hodi afilia ba FRETILIN.

Responsavel Partidu Unidade Nasional (PUN) Manuel Soares lori nia militantes hamutuk 1045 hodi afilia ba FRETILIN.

Nune’e mos, Responsavel Partidu Demokrata (PD) Carlos Lazaro de Jesus lori nia militantes 107.

Aliened ne’e, Vice koordenador Jose Mendes husi Partidu Sosial Demokrata (PSD) iha Sub Distritu Atabae (Balibo) lori nia militante 85 hofi afilia hikas ba nia uma knua FRETILIN.(ade)

.