“Lu-Olo-Alkatiri Pakote Forte FRETILIN”

.

Timor Post - Kuarta, 01 Juñu 2011

Dili- Dr. Marí Alkatiri no Francisco Guterres Lu-Olo prienxe ona formulariu, sai pakote ida, kandidatu ba eleisaun Direta Partidu Politika FRETILIN, ba Pozisaun Prezidente no Sekretariu Jeral, iha formulariu ne’e, Marí no Lu-Olo deklara hetan apoiu husi militante 5,000.

Partidu FRETILIN tinan ida ne’e, realiza eleisaun istoriku ida, atu hili lideransa partidu ba periudu 2011-2016, durante fulan hirak liu ba, partidu ne’e loke ona rejistu militante ka eleitor, no iha Maiu nia laran, loke oportunidade ba kader FRETILIN sira, atu compete ba kandidatu, Prezidente no Sekjer FRETILIN.

Eleisaun direta ne’ebé partisipa husi militante rihun ba rihun iha distritu hotu, sei akontese 30 Agostu 2011.

Iha fulan Maiu nia laran, Komisaun Nasionál ba preparasaun Organizasaun (KNPO) loke ona oportunidade ba kader FRETILIN sira, atu deside pakote lider no rezista aan ba KNPO iha sede Comite Central FRETILIN (CCF) iha Comoro, Dili.

Vise Prezidente Komisaun Nasionál ba preparasaun Organizasaun (KNPO), Antonino Bianco informa asuntu ne’e ba Timor Post iha CCF Dili, Tersa (31/10).

Nia esplika, desde loke ba públiku atu compete ba kandidatu Prezidente no Sekretariu Jeral, foin mak Dr. Marí Alkatiri no Lu-Olo prenxe no hatama formulariu ba (KNPO).

“Agora sei iha oportunidade ba militante to’o 20 Juñu 2011, ne’ebé hakarak atu avansa ho sira nia pakote, maibe tenki aprezenta uluk ho apoiantes masimu 5.000 resin,”Bianco dehan tan.

Bianco informa, total militante ne’ebé tama iha baze de dadus to’o 20 Maiu 2011, atinji ema 129.921, rekoilha husi distritu 13.

Tuir kalendariu, kandidatu ne’ebe atu partisipa iha eleisaun direita Prezidente no sekretariu Jeral tenke aprejenta a’an iha loron 1-20 Juñu 2011, hafoin eleisaun 30 Agusto 2011, tuir kedas ho tomada de pode ba lideransa.

Hafoin ne’e, prepara aan ba kongresu nasionál Partidu FRETILIN iha setembru 2011.

Tuir observasaun diariu ne’e, iha edifisiu CCF militantes no simpatizantes sira antusiasmu no movimentus tebes, forma hodi rejistu naran hodi foti kartaun militantes.

Kona-ba urna ba eleisaun, Bianco informa, Sekretariadu Tekniku Administrasaun Eleitoral (STAE) pronto fasilita urna ba Partidu Politika (Parpol) FRETILIN, atu uza ba eleisaun direta Prezidente no Sekretariu Jeral, 30 Agustu 2011.

“Ami koopera ona ho governu liuliu STAE, sira pronto atu fasilita URNA, atu tau iha estasaun de votu,”Vise Presidente Komisaun Nasional ba preparasaun ba organizasaun (KNPO), Antonino Bianco ba Timor Post iha CCF Dili, Tersa (31/05).

Entertantu diáriu ne’e ba konfirma asuntu ne’e ho director STAE, maibé resepsionista husi STAE hateten,”Oras ne’e dadaun Diretór laiha tempu, tanba sei hala’o hela inkontru, se bele, aban mai halo apoitmen uluk, depois mak ami telephone, mak maun mai halo entervista.(Max)

.