Faltas Kadeiras, Mejas no Merenda Eskolar, Deputadus Moe Halo Konsolidasaun Partidu

.

Josefa Parada - Sesta, 10 Junhu 2011 - SUARA TIMOR LOROSAE

DILI_Reprezentante povu iha uma fukun Parlamentu Nasional (PN) tantu husi komisaun ka partidu, senti Moe bainhira tun ba Distritu halo fiskalizasaun ka konsolidasaun partidu sempre hasoru problema kona ba faltas kadeiras ho meja ne’ebe levanta husi komunidade.

“Hau moe kuandu ita tun ba iha Distritu, tantu ita husi komisoens ka partidu ba halo konsolidasaun problema ne’ebe mak ema foti ne’e sempre hanesan deit kona ba karteiras, mejas no merenda eskolar, Ministru mai iha Parlamentu Nasional (PN) ne’e ita bolu tiha ona, koalia ho maneira ne’ebe diak liu ona hanesan reprezentante povu mais hau hare’e Ministru ne’e kulit mahar duni tanba ema lori to’o kaixao tiha ona mais Ministru ne’e labele aprende husi situsaun,” hatete deputada husi bankda PD Getrudis Moniz iha uma fukun Parlamentu Nasional (PN), foin lalais ne’e.

Nia rasik kontenti bainhira governu hili ka nomeia Ministru Joao Cancio, hanesan ministru ba Edukasaun, tamba tuir nia hatene Ministru Joao iha konhesementu klean konaba edukasaun, maibe realidade to’o oras ne’e, komunidade sempre kestiona konaba problema edukasaun.

Kestaun hanesan reforsa husi Francisco Jeronimu Deputadu ne’ebe trata ba asuntu edukasaun, saude no kultura dehan problema kona ba edukasaun tantu kondisaun eskola, karteiras, mejas no merenda eskola, laos akontese deit iha Distritu no Sub Distritu maibe iha Dili laran mos kondisaun eskola sei la permite ba estudante sira atu tuir prosesu aprendizazem. Natalia Moniz

.