Hussi: Joãozito Viana
Eletrisidade sei mate hela deit, fos sei karun ba beibeik, ema barak sei konsumu be'e-mota nomos iha bairo-bairo labarik sira barak la matabixu no komesa nakonu iha luron Dili laran hodi halo negosio.
Iha Uma Fukun PN, iha Palacio Guverno, iha Palacio Cienzas no Tribunal, no etc, bo'ot sira ne'e lakohi rona malu ona, tu'ur nonok, sensibilidade mate tiha ona, tilun lakohi rona, matan komesa delek.
Triste, bainhira bo'ot sira agora preokupa liu atu ukun tan iha 2012, povu sei hein "Mesias" foun iha klima ukun rasik an, halo ema hotu sai apatia, lakohi koalia ona tanba bo'ot sira nunka rona sira, dalan sei naruk hodi fo prosperiedade ba ema hotu.
Iha kantu sidade Dili, grupu ki'ik-oan goza duni, loron kalan nakonu iha bar, nokonu iha restaurante, hela iha uma foun ho moru as, kareta luxu ho vidru metan, uza mina morin karun no roupa rebo-rebo.
Timor Leste agora iha krize sensibilidade, autoridade no instituisaun estado fraku ba beibeik. Lahatene atu hatete ba se, husu se no bainhira los mak povu rai doben ne'e atu goza netik "dosi" ukun rasik an ho dignidade.
.
0 comentários:
Enviar um comentário