Ema hirak ne’ebé mak lakon hela fatin, sente triste tanba Governu la kumpri promesa hirak ne’ebé mak halo ona

.

SAPO TL ho PNN Portuguese News Network - 17 de Junho de 2011

Ajénsia PNN nian fó sai katak, hafoin fulan hitu haruka komunidade husi bairu Perumnas nian sai husi Fakuldade Brigadas husi Polísia Indonézia nian iha Dili, mak membru husi komunidade hirak ne’e husu intervensaun husi Gabinete Provedór ba Direitus Humanus nó Justisa nian.

Intervensaun ne’e halo husi komunidade sira, tanba promesa ne’ebé mak halo husi Ministra Justisa nó mós husi Primeiru Ministru, Xanana Gusmão rasik, katak sira sei selu hikas fali ká sei fó kompensasaun ba família hirak ne’ebé mak sai ona hanesan vítima ba problema ida ne’e.

Maibé, sira la haktuir promesa ne’ebé mak sira halo ne’e nó sira rezolve ona atu halo manifestasaun iha Gabinete Provedór husi Direitus Umanus nó Justisa nian oin.

Tuir deklarasaun ne’ebé mak hato’o ba iha jornál Independente, Ricardo Soares, ne’ebé reprezenta komunidade hirak ne’ebé mak sai hanesan vítima ba iha kazu ne’e, husu intervensaun husi Gabinete Direitus Umanus nó Justisa nian nó ezizi atu Ministru Justisa nó Solidariedade Sosiál nian bele kumpri ho promesa ne’ebé mak sira halo ona ne’e, atu hodi fó materiál kontrusaun hodi harii uma ká hela fatin foun.

“To’o oras ne’e Governu sira promete katak ajuda ba kontrusaun hodi harii uma ne’e, sei demora de’it iha loron tolu nia laran. Maibé promesa ne’e liu ona fulan barak nia laran nó to’o agora ami seida’uk simu buat ida”.

Tuir PNN, situasaun hirak ne’e hotu, halakon ona oportunidade servisu nian ba komunidade balun, hanesan mós dezisténsia husi estudante na’in-lima husi estabelesimentu ensinu nian.

Sebastião Dias Ximenes, ne’ebé hanesan Provedór, husi Direitus Umanus nó Justisa nian, haruka ona karta ida ba iha Ezekutivu timor-oan, hodi husu atu bele rezolve problema ne’e.

Tuir Ximenes, Provedór ne’e simu ona promesa atu hodi fó ajuda ba komunidade iha reuniaun ne’ebé mak halo ona ho Ezekutivu anteriór.

.