Don Basilio: " FRETILIN Komesa Dinamis”

.

Timor Post - Segunda, 20 Juñu 2011

Baucau-“Bispo Dioseze Baucau, Don Basilio do Nascimento hateten, Partidu FRETILIN oras ne’e dadauk uza ona sistema dinamismu, iha ninia partidu laran atu hetan resposta tuir tempu agora no aban bainrua, atu hetan di’ak ba Partidu nia vida.

Bispo Baucau kasu lia hirak ne’e ba jornalista Diariu Timor-Post, sexta semana liuba iha nia knar fatin, bainhira husu ninia hanoin konaba eleisaun direita ba kandidatu prezidenti no Sekjer Partidu

FRETILIN tinan ida-ne’e.

“Ha’u hanoin, demokrasia moris iha partidu laran, ha’u lahatene sira nia estatutu, hateten saida? Ha’u hanoin, partidu hotu-hotu iha regulamentu internu, ne’ebé fó orientasaun ba sira nia moris, aktividade,” Amo Bispo dehan.

Nia hateten, dinamismu hotu-hotu iha partidu ida-idak, signifika de’it katak idea ne’ebé ke partidu sira hotu buka, ida ne’ebé diak liu ba partidu nia vida,” Amo Bazilio dehan.

Amo Bazilio dehan dinamismu signifika bo’ok an, labele moris bei-beik ho situasaun ida ba nafatin iha ita nia moris.

“Ita hetan solusaun ba problema sira ne’ebé ke ita hetan, iha tempu moris, iha tempo hanesan ne’e, ita hetan resposta ida, maibé resposta hirak ne’e, la serve ba situasaun seluk, ne’e duni, durante tempo ida, ita bele hetan situasaun ida, bele hetan resposta ida, maibé depois ba situasaun foun, dala barak resposta ne’ebé ita hetan uluk, la serve ona,” Amo Basilio dehan tan. (gut)
.