Tribunal Dili Akuza Christopher Halo Krime 7, Ameasa Komarka Tinan 2 - 6

.

Written by Marcelino Pereira - CJITL - Thursday, 05 May 2011

CJITL Exlusivu, Ministerio Publiku - MP lori artigos 4 husi kodigo penal Timor Leste nian halo akuzasaun hasoru Director Lalenok Ba Ema Hotu – LABEH, Quarta semana ne'e (4/5) iha Tribunal Dili.

Durante procesu audensia, juis ne'ebe preside julgamentu, Joao Ribeiro rona tiha alegasaun husi MP konaba akuzasaun ba Director LABEH falsifika documentus maibe audensia labele kontinua tanba sasin sidauk prontu iha tribunal.

MP akuza Christopher ho kodigo penal TL nian ho artigo 303 no artigo 304 ho nia pena prizaun tinan rua 2 to’o tinan nen 6 Artigo rua ne’e existe iha dia 7 de junho 2009, nudar akuzasaun ba krime primero, no artigo 26, artigo 28 kode penal TL nian ba krime segundu no terseiro artigo hirak ne’e, MP alega ba Christopher nudar Arguido ba krime falsifikasaun documentus.

Durante deklarasaun husi MP iha procesu Audencia, MP la identifika dokumentus saida husi Arguido halo, maibe MP akuza arguido ho artigo 4, nu'udar arguido komete iha krime falsifikasaun documentus.

Iha parte sorin, Cancio Ximenes, Defensor públiku ne'ebe defende Christopher iha tribunal, hato’o mos sira nia argumentu hodi defende sira nia kliente husi akuzasoens nebe’e deklara husi akuzadora Angelina Saldanha.

Defensoria Públiku Cancio Xavier husu ba juis iha meza atu konsidera sira nia kliente tamba sira nia kliente preparadu atu tuir processu julgamentu iha tribunal Dili no DP lamenta ho MP nia argumentu ne’ebe hakarak adia julgamentu tanba testemunha principal husi MP nian la marka prezensa iha tribunal Dili.

hafoin processu Audencia remata, Christopher hateten; nia parte triste ho MP hodi adia julgamentu tamba liu tinan 10 ona MP la prepara an.

Director LABEH ne’e hateten, nia parte hakruk ba disizaun Tribunal no kolobora nafatin ho Justica, no MP akuza nia halo krime 7 husi falsifikasaun dokumentus maibe MP la identifika nia parte falsifika dokumentus saida kestiona.

Desizaun Rribunal Dili adia julgamentu ho razaun tanba precisa halo tradusaun ba dokumentu sira iha lian engles no razaun seluk laiha testemunha nebe’e apresenta husi MP, ho nune’e processu julgamentu ba Cristopher , tribunal Dili adia ba loron 25 de maiu tinan ne’e.

Maske nune’e defensor públiku Cancio Xavier ne’ebé atende kazu alegasaun hasoru nia kliente iha tribunal Dili, informa ba reporter katak, kazu nebe Ministerio Públiku alega ba nia kliente konaba falsifika dokumentu ne’e sedu liu, no konaba adiamentu julgamentu tanba precisa halo tradusaun ba dokumentu sira iha lian englesh nian Cansio hateten ne’e laos rasaun principal hodi adia julgamentu tamba tuir defensor ne’e hateten, processo julgamentu bele lao nafatin tradusaun mos bele halo dadaun. (Marcelino Pereira/CJITL Reporter)

.