PRESIZA PROMOVE DIREITU LABARIK

.

Josefa Parada - Kinta, 19 Maiu 2011 - SUARA TIMOR LOROSAE

DILI – Estadu nudar orgaun nebe aas, tenke proteze no promove direitu labarik sira nian atu asesu ba edukasaun, saude, tanba sira mak jerasaun nebe sei hatutan estafeta nasaun nee aban bainrua.

“Ita tenke promove diretu labarik sira nian, nee importante tebes ba nasaun, Governu tenke tau matan ba sira, tanba future sei lori nasaun nee ba oin,” Ministra Justica Lucia Lobato kasu lia hirak nee ba STL iha Sentru Formasaun Judisiariu, Caicoli Dili, Tersa (17/5).

MJ Lucia hatete tuir dadus estatestika, 50% populasaun Timor Leste tama iha kategoria labarik, nee signifika katak Governu tenke esforsu makaas atu haree no garantia 50% polulasaun TL nebe labarik. Kria kondisaun ba labarik sira atu moris iha situasaun favorabel.

Nia sublina katak diskusaun ida nee bele submete ba Konselho Ministrus hodi hetan aprovasaun no haruka ba parlamentu Nasional hodi aprova nudar lei direitu labarik sira nian.

.

Iha fatin hanesan Komisaris Direitu Labarik, Adalgisa Ximenes hatete, Governu fo tan pasu ida atu fo atensaun ba direitu labarik sira nian hanesan parte ida aas. “Ita bele haree fila fali oinsa maka Governu bele asegura fali lei seluk, hanesan lei poder paternal no adopsaun, konaba labarik nian no buat barak presiza ita tau atensaun,” hateten Adelgisa.

Governu tuir nia fo atensaun makaas ba kestaun labarik hahu ho kodigu ba labarik nebe hanesan baze legal atu fo atensaun ba labarik sira iha TL.

Direitur Asosiasaun HAK, Rogero Viegas Vicente iha nia pontu devista hatete, Asosiasaun HAK nian haree katak kriasaun esbosu lei kodigu labarik nian parte ida importante no fundamentu tebes atu gqrantia direitu labarik sira nian.

HAK katak Viegas, apersia tebses inisiativa Ministra Justisa Lucia Lobato nian nebe iha konsensia nebe boot tebes atu dezenvolve esbodu lei nebe daudauk sosializa. “Tuir hau nia hanoin importante tebes prezisa halo kunsultasaun nebee klean, importante maka lei kodigu labarik nee bele liga ho kontekstu real labarik Timor Leste nian,” hateten Rogero.

.

Nune mos Etalvina da Costa, sente kontenti ho programa nebee halao husi Ministra Justica, liu-liu esbosu lei nebe ministeriu nee produs atu garantia direitus labarik sira nian. “Lei nee bele fo atensaun ba labarik sira nebee inan aman laiha kbit atu fo asistensia, no sira nebe la asesu ba edukasaun tanba ekonomia la admiti,” Etelvina hatete. alm

.