Negosiasaun Kadoras GSR, “Sosiedade Sivil Apoiu Involve Alkatiri”

.

Jornal Nacional Diário - Kinta, 12 Maio 2011

ONG Luta Hamutuk ho Yayasan HAK konkorda ho Proposta Prezidente Republika Jose Ramos Horta nian, atu involve eis Primeiru Ministru Mari Alkatiri iha prosesu negosiasaun ho Australia kona ba kadoras (Pipeline) Greater Sunrice (GSR) dada mai Timor Leste.

Diretor Ezekutivo Luta Hamutuk, Mericio Akara hateten, prosesu negosiasaun GSR tenki involve peritu Timor oan ne’ebe iha kapasidade. Labele hare ba ema ne’e nia kor politku ka etniku.

Proposta Prezidente Horta nian atu involve Alkatiri ne’e rasional, tamba ne’e maka diak liu ita hotu tenki tau ses interese grupu ka interese politika,”afirma Mericio Akara ba JNDiario iha nia knar fatin, kuarta (11/5).

Akara hateten, prosesu negosiasaun kadoras GRS mai Timor Leste la bele ba ho ema ida mesak, tamba ne’e tenki involve ema matenek balun hodi bele reforsa argumentu povu Timor Leste nian hodi dada kadoras GSR mai rai doben ne’e.

Nia argumenta katak, eis PM Mari Alkatiri hatudu tiha ona ninia kapasidade wainhira assume xefe governu anterior no sai negosiator kona ba mina Timor nia ho Australia.

Iha tempo governasaun anterior, dehan Alkatiri, Alkatiri mos konsege estudo viabilidade ne’ebe rasional tebes hodi la aseita opsaun kompanha woodsaide nian ati esplora mina GSR namlele iha tasi leten (floating).

Iha negosiasaun kadoras GSR mai TL, tuir Akara, la bele ba ho ibun mamuk maibe tenki ho estudu viabilidade ne’ebe forte no rasional, tamba ne’e, tenki banati tuir politku negosiasaun ne’ebe Alkatiri halo tia ona ho Australia kona ba posu Mina Bayu Undang.

Negosiasaun ne’e involve peritus barak, inklui mai husi norwegia ho petter Goltberg, reprezetante Timor Leste nian iha estadus Unidus, hetan susesu boot hodi Timor Leste manan 90% mai Timor Leste no 10% ba Australia.

Direktor Ezekutivo Yayasan HAK, Rogeiro Viegas Vicente konsidera katak, eis PM Alkatiri nudar ema Timor oan ne’ebe iha kapasidade negosiasaun diak tebes, bele involve direita iha negosiasaun ho Australia kona ba kadoras GSR nian atu dada mai Timor Leste.

Rogerio argumenta katak, negosiasaun kadora GSR mai Timor Lestenudar interese nasional, tanba ne’e governu AMP la bele hare Alkatiri hanesan rival Politika.

Tuir lolos, Rogerio hatutan, governu tenki tetu proposta Prezidente Ramos Horta nian atu involve direitamente Alkatiri iha negosiasaun ne’e, tamba Alkatiri iha duni kapasidade no konhesementu diak kona ba prosesu negosiasaun mina nian ho Australia.cal

.