FRETILIN LA'OS AUTOR, MAIBE SAI VITIMA DA KRISE DE 2006

.

Hussi - Gregório Saldanha

Resposta hasoru diskursu Sr. Mariano Sabino iha konsolidasaun PD iha Vila Verde, aldeia Nope,14/05/2011 katak Fretilin maka Autor Krise 2006

Povo Timor Leste fo'o ona nia testemunha katak laos Fretilin maka halo krise 2006, maibe nia sai vitima husi konspirasaun partidu politiku oposiasaun sira, inklui PD, no mos konspirasaun internacional husi Australia.

Saida maka sira hakarak? Hadau PODER no kontrola MINA RAI. Ita hotu hatene katak momentu neba Fretilin maka kaer ukun iha rai ne'e. Laiha logika ba Fretlin atu harahun nia governasaun rasik, tamba ne'e signifika aventura no oho'an (bunuh diri) antes ema oho nia.

Maibe embora nune, tuir Fretilin nia natureza wainhira hahu husi kedas nia moris (existencia), "nunka abandona nia responsabilidade ba povu no rai ida ne'e".

Hau hakarak refere ba prontidaun no nosaun de responsabilidade husi Ministro Interior Rogerio Tiago Lobato iha tribunal Timor Leste nia oin, no prontidaun no nosaun de responsabilidade husi Primeiro Ministro Dr. Mari Alkatiri iha tempu neba hodi presta deklarasoins iha autoridades TL sira nia oin relaciona ho krise 2006. Saida maka akontece e que, laiha justifiksaun atu kondena dr. Mari Alkatiri ou Fretilin, nebe nia rasik assume kargu nudar Secretario Geral partido.

Ora bem, hau la'mai ho intensaun atu gaba (elogiar) ka minimiza (hatun) ema ruma, maibe hau sente orgulho halo parte iha Fretilin nebe nia lideres sira huri uluk kedas, mesak ema nebe iha responsabildade deit.

Se la'os tamba responsabilidades nebe hatudu husi Fretilin no nia lideres sira durante tempu krise karik, ohin ita la'moris iha rai ida hakmatek no demokratiku. Se la'os tamba sentidu de estado nebe prova ona husi Fretilin no nia dirigentes sira karik, ohin ita hetan Timor Leste ida nakonu ho odiu no vingansa iha Povu Maubere nia let.

Hau, no ami husi Fretilin laiha kompetencia atu tau kanuru tohar ba decisaun PD atu koliga ho se deit, inklui CNRT nebe dirigidu husi ita nia Maun Bo'ot Xanana Gusmao.

Maibe ami iha obrigasaun no direitu tomak atu defende ami nia partidu nia dignidade, partidu nebe hanorin ami iha tempu naruk atu firme nafatin mesmu iha terus, hanorin ami atu hadmomi no serbi povu kiak Maubere no rai kik'oan Timor Leste.

.