Josefa Parada - Segunda, 23 Maiu 2011 - SUARA TIMOR LOROSAE~
DILI–Partidu Fretilin hamutuk ho nia militantes no simpatizantes sira halibur aan hamutuk iha Comite Central Fretilin (CCF), Komoro-Dili, Sesta (20/05), hodi komemora loron restaurasaun independensia Timor-Leste ba dala sia. Iha momentu importante nee, Sekretariu Jeral Fretilin, Mari Alkatiri, hateten, partidu nee sei kontinua mobiliza rai ida nee ba futuru nebee diak.
Atu garante dezenvolvementu paiz ida nee sai diak liu iha futuru, Fretilin prepara aan ona hodi hakat ba eleisaun 2012, ho espetativa boot, katak, Fretilin sei manan vitoria eleisaun jeral tinan oin mai, hodi kaer ukun iha governu.
“Fretilin hakarak atu kontinua mobiliza rai ida nee ba oin nafatin. Tanba ita ema Maromak bele bolu, maibe Fretilin, Maromak labele bolu,” dehan Alkatiri liu husi ninia diskursu iha CCF-Dili.
Entretantu, Prezidente Partidu Fretilin, Francisco Guterres Lu-Olo, afirma, Fretilin nudar partidu uniku no partidu istoriku. Needuni, husu ba apoiantes Fretilin nian tomak, atu fiar aan nafatin katak, Fretilin sei manan iha eleisaun 2012 mai. Fretilin mak hatene liu kona istoria kona ba maluk sira nebee maka mate iha tempu rezistensia, hahuu husi 1974 too 1999. Mundu tomak mos koinese tiha ona ho partidu istoriku ida nee, tanba ema barak maka mate hodi defende naran partidu ida nee.
Lu-Olo mos garante katak, Fretilin sei la husiik ema seluk atu mai sobu partidu istoriku ida nee. Oras nee dadaun, numeru militantes Fretilin nian aumenta tan, see kompara ho tinan 2007 liu ba. Iha Distritu Baucau, rejista ona 25.035, Distritu Viqueque 14.000, Distritu Ermera 11.500, Distritu Bobonaro 9.529, Distritu Covalima 8.042, Distritu Liquiça 7.395, Distritu Lautem 6.345, Distritu Manufahi, 4.827, Distritu Ainaro 3.075, Distritu Manatuto 4.078, Distritu Aileu 3.071, Distritu Oecusse 3.975. Ho dadus hirak nee, tuir Lu-Olo, hatudu katak kompara ho rezultadu eleisaun 2007 nian, numeru ida nee liu tiha ona.
Iha distritu 9 mak ultra passa ona rezultadu 2007 nian. Maibe sei iha tan livru atus ida resin mak sei hatama hela iha baze de dadus Fretilin nian.
Lu-Olo hanoin, ho rejistu nebee maka oras nee Fretilin halo iha CCF, hatudu katak, iha eleisaun 2012 mai, Fretelin sei manan, hodi hadia fila fali dezevolvementu ba iha rai ida nee nian. Prezidente Fretelin mos hatutan, tinan 37 ona Fretilin halo ninia loron istoriku liu husi selebrasaun da restaurasaun indenpendesia nebee komemora ba dala sia ona.
Needuni, laos foin ukun aan maka Fretilin halo ninia istoria. Hahuu kedas husi rai nia moris, Fretilin hahuu halo kedas istoria kona ba Timor ida nee, istoria nebee naruk tebes too iha tinan 37 ida ohin nee.
Lu-Olo husu ba militante tomak atu konsiente katak, Fretilin mak partidu nebee imprime demokrasia iha Timor-Leste, liu husi prosesu funu, nebee diferente ho rai seluk-seluk nian. Maski nudar partidu ka movimentu libertasaun ida iha tempu pasadu, maibe Fretilin bele halo mos toloransia boot ida hodi haburas demokrasia, bainhira Timor-Leste hetan ukun rasik aan.
“Hau fiar katak Fretilin sei manan eleisaun 2012 oin mai. Tanba ho militante nebee maka partidu ida nee iha, hatudu mos mai ita atu ema seluk nebee hanesan naokten labele ukun rai ida nee. Ukun rai ida nee tenke ukun loloos, laos lori fali nasaun sai fali hanesan buat ida ke la vale no halo konforme tuir ema ida-idak nia hakarak deit. Fretilin ukun para atu hadia fali sistema governu ida agora nian, nebe kuaze ita haree halo programa barak, maibe kotu-kotu hela deit iha dalan klaran,” nia dehan.
Nunee mos Maria Madalena, nudar militante Fretilin, hateten, “hau fiar katak Fretilin sei manan eleisaun iha 2012 mai, tanba agora deit iha partidu balun maka hakarak foo aan mai tama iha partidu istoriku nee”.
Simpatizante seluk ho naran Albertinho Barros mos tau konfiansa vitoria ba Fretilin. “Hau hanesan simpatizante Partidu Fretilin nain, fiar katak, Fretilin sei manan eleisaun iha tinan oin mai, tanba partidu Fretilin hanesan partidu istoriku mai ita Timor-oan hotu. Ema hotu hanete katak Fretilin nebee mai husi CNRM too iha CNRT, ida nee mak Fretilin istoriku iha rai ida nee,” nia hateten.
Alende selebra loron restaurasaun independensia, Comite Central Fretilin mos halo inagurasaun ba Radio Lian Maubere nebee lakon kleur ona. son
.
0 comentários:
Enviar um comentário