Dom Alberto: “ Istoria Independensia TL Hakerek ho Ran”

.

Josefa Parada - Kinta, 19 Maiu 2011 - SUARA TIMOR LOROSAE

DILI- Nasaun Timor Leste marka ona istoria foun iha prosesu independensia ka ukun rasik an. Maske nasaun ne’e hetan nia independensia iha sekulu 21, hodi hasoru obstakulo no dezafiu oi-oin, maibe ho prinsipiu metin nasaun ne’e hakarak dezenvolve nia an, iha nasaun sira seluk nebe dezenvolvidu tiha ona durante tinan barak.

Timor Leste hanesan nasaun jovem, hakat tan pasu ida ba oin hodi selebra ninia independensia ba dala sia (IX) (20 Maio 2002-20 Maio 2011). Independensia nebe nia hetan liu husi prosesu nebe naruk no defisil tebes, liu husi sakrfifisu bo’ot, ema barak lakon nia vida hodi hetan independensia.

Amo Bispo D. Alberto, iha ninia homilia hateten independensia nebe povu Timor hetan liu husi prosesu nebe naruk no sakrifisisu nebe bo’ot, tamba asuwain barak maka fakar ran no mate atu liberta povu ne’e husi nakukun laran.

“ 20 de Maio sai selebrasaun istoria dadersan-dadersan, istoria ne’e hakerek ho osan mean, letra ida nebe hakerek ho ran, la tauk mate ba nia nasaun doben, katak ukun rasik an,” dehan D. Alberto, liu husi homilia selebrasaun misa agradesementu independensia, iha Igreja Imaculada Conceicão, Katedral Dili, Kinta (19/5).

Iha oportunidade ne’e mos D. Alberto husu ba sarani sira atu hakas a’an nafatin, badinas eskola, hakbesik a’an ba Nain feto Virgem Maria hodi reza tersu loron-loron, hodi agradese ba Maromak, atu nune’e selebrasaun independensia bele sai bo’ot ba nafatin, nabilan no buras iha Istoria nasaun ne’e.

Iha selebrasaun misa solene agradesementu Independensia ba dala sia, preside husi Bispo Dioseze Dili, Dom. Alberto Ricardo da Silva, Pr, no akompanha husi vigariu jeral Dioseze Dili, Pe. Apolinario da Silva Guterres, Padre paroko Katedral, Pe. Jose Antonio, asiste mos husi padres, madres, vise Primeiru Ministru (V-PM) Jose Luis Guterres, Prezidenti Parlamentu Nasional (PN) Fernando La Sama de Araujo, Prezidenti Tribunal Rekursu, Claudio Ximenes, membru Governu, Deputadu, Corpo Diplomatiku, Polisia Nasonal Timor Leste (PNTL), F-FDTL, estudantes, inklui sarani sira iha Dili laran. Tuir orario seremonia hasae bandeira halao iha Palasio Governu ho oras tuku 10 otl dader. Josefa Parada

.