Baku, Tafui Kareta MP :“FRETILIN Husu Deskulpa”

.

Jornal Nacional Diário - Tersa, 10 Maio 2011

Dili- Xefe Bancada Partidu FRETILIN, Aniceto Guterres husu deskulpa ba Partidu Demokratiku (PD) relasiona ho akontesementu baku bandeira ba kareta, tafui kaben ba kareta membru Parlamentu (MP) Xapa matrikula 0688 ne’ebe uja husi deputadu Tereza Maria de Carvalho.

Kronolojia akontesementu ne’e iha loron Domingo (8/5)iha area Rotuna Merkado Lama, Dili kuaze iha oras tuku 3 lokraik wainhira partidu FRETILIN halao konsolidasaun.

“Hau hasoru hau nia maluk FRETILIN ninia Militante ho bandeira FRETILIN mai baku bandeira ne’e ba kareita ne’ebe hau tur iha laran, tafui kaben ba kareta, hakilar dehan hau traidor no naok ten, hau hakarak hateten iha uma fukun ida ne’e katak desde inisiu hau la trai FRETILIN, tanba desde inisiu hau PD i uluk Indonesia nia tempo mos hau la trai rai ida ne’e, deklara deputadu Tereza Maria de Carvalho iha Plenaria segunda (9/5) horseik liu husi ninia intevensaun.

Ho atetude ne’ebe refere nia parte laran susar no triste ba akontesementu refere, tanba uza fali bandeira baku ba kareta, uluk kuandu ami uza atu halo asaun hasoru Indonesia nian oin, tanba ami respeita bandeira ida ne’e.

“Hau la simu katak, sira tafui kaben ba kareta trata dehan naok ten, hikus sira hakilar dehan AMP naok ten, traidor, mais bah au, hau la simu tamba maluk sira be horseik halo asaun lori bandeira halai kelilin deit ne’e dala ruma sira maka balu traidor karik, mais hau Teresa la traidor ida, hau mos laos uluk FRETILIN mak mai fali PD be hau trai FRETILIN.

Nia dehan, hari partidu laos atu kria i inimigu ba malu, trata malu, maibe hari partidu ho objetivu atu ukun hadia rai ida ne’e hodi hadia povu nia moris, laos atu insulta malu.

Ba kestaun ne’e xefe Bancada FRETILIN, deputadu Aniceto Guterres husu deskulpa ba atetude refere, maibe nia husu deputadu refere atu keixa kestaun refere ba instituisaun kompetente atu bele resolve, nudar chefe Bancada FRETILIN iha ne’e ami reprezenta partidu, ami husu deskulpa, maibe Sra. Deputada iha direitu tomak atu halo keixa ba autoridade kompetente hodi hetan prosesu, tamba FRETILIN sei la proteze ema ne’ebe iha tendensia at vingativu hanesan ne’e, Sra. Deputada iha ninia imunidade nudar deputada,se karik iha ninia hahalok, lia fuan ne’ebe mak nudar deputada hetan haktu sira hanesan ne’e sra. Deputada iha direitu atu hetan protesaun husi lei ne’ebe vigora iha rai ida ne’e,”koalia deputadu Aniceto.alf

.