Husi: Agos Santos - Jornal Independente - Tersa, 24 Maiu 2011
Dili-“FRETILIN nia lider nain rua, Francisco Guterres Lu-Olo ho Marí Alkatiri nudar ema sira ne’ebe fo ezemplo diak ba prosesu demokrasia iha Timor Leste.
Prezidete Repúblika José Ramos Horta hateten kritika barak hasoru lider nain rua ne’e durante krizi 2006 maibe sira kontinua hatudu sira nia nasionalismu hodi kontribui ba estabilidade, transparansia no demokrasia.
“Dala barak hau koalia ho ema seluk iha rai ida ne’e,… iha rai liur, ne’ebe que durante ne’e hau observa oinsa Marí Alkatiri nia terus iha 2006 nudar ema, nudar ser umanu…… nomos maun bo’ot Francisco Guterres Lu-Olo, hau hare ho hau nia matan,”Dr. Ramos Horta hateten iha ninia deskursu iha selebrasaun loron ASDT ba FRETILIN dala 37 iha Sede Comite Central FRETILIN, Sesta (20/5).
“Ne’e hatudu gandeza bo’ot no ezemplu diak ba ema hotu, hau admira tamba la’os uluk sai primeiru Ministru ka lidera FRETILIN no tempu naruk maibe admira liu tamba nia kondisaun umanista, maske nia terus pesoal iha tinan barak hau nunka rona nia hirus odiu tamba buat ne’ebe akontese ba nia ho politikamente ka pesoalmente.”
Horta hatutan FRETILIN ne’ebe hahu luta komesa husi 1974 to’o oin loron infrenta situasaun oi-oin, maske nune’e FRETILIN ne’ebe funda husi nia rasik ho Alkatiri ejisti nafatin hodi liberta tan povu ida ne’e husi mukit no terus nia laran.
Husi prosesu naruk ne’ebe liu ona, xefe estadu hateten, responsablidade bo’ot ba lideransa no militante tomak FRETILIN nian atu kontinua kaer metin transparansia no unidade nasional iha eleisaun jeral 2012.
“Iha tinan barak nia laran FRETILIN hatudu ona dame no unidade nasional tamba papel FRETILIN sentral no importante,” Dr. Ramos Horta hateten.
Presidente Partidu FRETILIN Lu-Olo
Lu-Olo hateten prosesu barak maka konsege FRETILIN ultrapasa no hetan ukun an husi sistema no mekanismu oi-oin.
Maibe ho ukun, Lu-Olo hateten, prosesu hotu tenke tuir lei ne’ebe vigora iha rai ida ne’e hodi labele tuir deit ema ida nia vontade.
Iha selebrasaun ida ne’e, FRETILIN mos lansa ninia Radiu Maubere, ne’ebe públiku bele asesu iha FM 99.9,” dehan Lu-Olo.
Sekretariu Jeral Partidu FRETILIN, Dr Marí Alkatiri
Dr. Alkatiri hateten tinan 37 FRETILIN nia moris ne’e signifika durasaun povu Maubere nia luta ba independensia.
“Ne’e hatudu katak, “Se FRETILIN laiha……Independensia mos laiha”, ne’e mak realidade, hakarak ka lakohi halo parte istoria povu maubere nian. Dehan Alkatiri.
Alkatiri hatutan, rejultadu luta ne’ebe FRETILIN nia, atu oinsa lori demokrasia no indepedensia mak ema hotu iha direitu atu hari’i partidu.
PM Guine Bissau Carlos Gomes Junior
iha fatin hanesan, Primeiru Ministru Guine Bissau Carlos Gomes Junior ne’ebe marka mos prejensa iha serimonia refere hatete istoria Timor Leste, liliu FRETILIN nia hanesan ho ninia partidu, partidu rua ne’e nia istoria hanesan deit, ne’ebe hasoru situasaun oioin deit, atu hetan Vitoria,”Junior dehan.
Tamba ne’e nia parte husu ba lideransa tomak FRETILIN nian atu kontinua esforsu an hodi lori prosesu luta ba libertasaun povu husi kiak ne’e ba oin tanba Vitoria rai ida ne’e FRETILIN mak hahu, hala’o, no hari’i to’o hetan nia independensia.
.
0 comentários:
Enviar um comentário