Josefa Parada - Tersa, 17 Maiu 2011 - SUARA TIMOR LOROSAE
BAUCAU–Sekretariu Jeral Partidu Fretilin, Mari Alkatiri, la fiar katak tribunal sei rejista Frente Rekonstrusaun Timor-Leste Independente-Mudansa (Fretlin-Mudansa), nebee deklara aan nudar partidu iha tempu hirak liu ba.
“Hau la fiar katak tribunal sei autoriza sira (Fretlin-Mudansa) atu rejista. Sira ho sira rasik fahe ba malu ba tolu. Ami sei foo informasaun nee ba tribunal,” dehan Alkatiri liu husi programa konsolidasaun partidu iha Baguia, Sabadu (14/5).
Alkatiri husu militantes no simpatizantes sira, atu lalika preokupa ho naran Fretlin-Mudansa, tamba lideransa Fretilin tau tiha ona travaun atu lao ba oin. Fretlin-Mudansa sira balun tama ona iha partidu seluk no balun la hatene atu lao ba nebee.
“Grupu ida mak halo fali Fretlin-Mudansa, sira bolu Frente Rekonstrusaun Timor-Leste Independente. Uluk Indonesia tama iha Timor atu sobu no muda Fretilin, maibe la konsege,” tenik Alkatiri.
Sekretariu Jeral Fretilin nee, lamenta ho lalaok Fretlin-Mudansa nebee laos muda deit na
ran original Fretilin nian, maibe muda mos bandeira. Ema nebee matan laduun mos mak bele konfundi karik, tamba koor bandeira la hanesan ho bandeira Fretilin nian.
Iha fatin seluk Ministra Justisa (MJ) Lucia Bradão, hatete, atu sai partidu hodi konkore iha iha elisaun 2012, partidu refere tenki hetan legalidade konstitusionalmente husi tribunal, tanba nee distinu Grupu Fretlin-Mudansa nebee rejista-an sai partidu iha tribunal nia liman.
“Se Fretlin-Mudansa sai partidu, konserteza sira iha direitu tomak atu harii sira nia partidu. Tuir lei, atu harii partidu tenki rejista hanesan sira sei hatama sira nia pedidu no dokumentus hotu tuir lei haruka,” dehan Ministra Justisa Lucia.
Ministra nee esplika, tuir lei, sidadaun hotu iha direitu atu rejistu sira nia partidu ka organizasaun ruma hodi konkore iha elisaun 2012.
“Laos Ministeriu Justisa mak iha kompetensia atu haree, maibe ministeriu so simu no prosesa dokumentus depois haruka ba tribunal. Tanba nee, so tribunal deit mak iha kompetensia atu deside sai partidu ka lae? I konaba kriteria sira nee, lei partidu politiku iha,” esplika Lucia Bardão.
Nunee mos Deputadu Mario Viegas Carrascalão husi PSD, hanoin, problema Fretlin-Mudansa nee kuaze atu hanesan ho CNRT. Uluk CNRT mos organizasaun ida no reforma fali partidu ho ninia subtansia seluk fali. Kestaun konkorda ka la konkorda nee oin seluk, pessoalmente nia rasik la konkorda.
“Ba hau, naran CNRT ho Fretilin nee, naran istoriku. Naran istoriku ita labele utiliza fali oi-oin deit, tamba nee naran boot. Ita tenki respeitu hotu naran sira pasadu nian nee. Agora ita tau fali rekonstrusaun nee, maibe nia singkatan Fretilin nafatin no ida fali CNRT nafatin, mai hau nee la loos. Mais pronto, tribunal simu ka la simu, nee tribunal maka disidi,” dehan Mario.
Fretlin-Mudansa nebee hasees aan husi CNRT, katak Mario, impaktu nee iha, tamba Fretlin Mudansa wainhira sai husi Fretilin, sira lori sai sira nia massa. Nunee mos Fretlin Mudansa sai husi CNRT sei lori sai mos massa. Needuni, see Fretlin Mudansa nee sai husi CNRT, sei dada mos ema barak nebee durante nee tuir sira.
Deputada Virginia Ana Belo husi Bankada CNRT hatete, Fretlin-Mudansa nebee haketak husi CNRT sei laiha impaktu, tamba ida nee maka dalan diak liu atu sira hetan legalidade, nunee tuun ba baze hodi halao kampanha, ema bele fiar sira.
“Ita hot-hotu nia hakarak katak sira tenki iha legalidade ida para tuun ba baze, kuandu ba koalia, ema bele fiar sira. Ida nee ba ami, laos problema, maibe demokrasia maka ida nee,” dehan Virginia. lay
.
0 comentários:
Enviar um comentário