“Alkatiri La Fiar Tribunal Autoriza GFM Sai Parpol”

.

Timor Post - Kuarta, 24 Maiu 2011

Dili-“Sekretariu Jeral Partidu FRETILIN, Dr Marí Alkatiri la fiar tribunal sei autoriza Grupu FRETILIN Mudansa (GFM) atu sai partidu politiku (Parpol), tanba FRETILIN iha Timor Leste ida deit, laiha FRETILIN rua.

Alkatiri deklara ida ne’e iha entervista durante oras ida iha Radio Maubere Frekuensia 99.9 FM, Tersa (25/5) hourseik lorokraik.

“Hau la fiar tribunal atu autoriza grupu ne’e sai partidu, karik autoriza mos, sira labele sai ba fatin ida, tanba laiha militante,”Alkatiri dehan.

Nia esplika, Partidu FRETILIN ne’e partidu istoriku ne’ebe luta to’o Timor Leste hetan Independensia, 20 Novembru 1975 to’o restaura fali Independensia 20 Maiu 2002.

Alkatiri kestiaona kona ba bendera no simbolu ne’ebe GFM uza,”Bandeira FRETILIN ne’e, ema fakar ran, mate iha rai ne’e, atu defende nia, Agora sira uza bandeira hanesan, maibe tau fali kor oinseluk, uluk Indonezia okupa rai ne’e, mos la estraga bandera hanesan ne’e,”Alkatiri dehan tan.

Hanesan públika tiha ona iha edisaun 23 Maiu 2011, Ministeriu Justisa simu tiha ona dokumentu ofisial husi grupo FRETILIN Mudansa (GFM), atu estuda didiak hodi haruka fali ba Tribunal Rekursu atu foti desizaun, bele sai partidu politiku ka lae.

Ministeriu Justisa, Lucia Lobato hato’o informasaun ne’e ba jornalista sira iha Dili, sesta (20/5), bainhira hudu kona-ba ezijensia Grupu FRETILIN Mudansa atu sai partidu politiku (parpol).

Tuir Lucia Lobato, Ministeriu Justica estuda ho seriu dokumentu sira, liu-liu kona bandeira no simbolu sira, ne’ebe atu uja karik hanesan partidu seluk.

“Iha tempu badak sei hare ami estuda dokumentu sira, ne’ebe ho asina rihun ba rihun, hodi haree didiak, grupu ne’e serve duni atu sai partidu politiku ka lae, administrativamente prepara dokumentu hamutuk ho pedidu, no hala’o tuir rekejitu sira ne’ebe transforma ona iha lei,”Lucia hateten.

Grupu FRETILIN Mudansa oras ne’e iha konfiansa atu sai partidu politiku, nune’e bele partisipa eleisaun 2012,”Ami husu ba GFM para hein dokumentus ne’ebe MJ sei haree, kona-ba atributus ne’ebe usa husi GFM diferensia ka iha simbolu balun ne’ebe hanesan ho partidu seluk,”Lucia esplika tan.(00)

.