Josefa Parada - Kinta, 19 Maiu 2011 - SUARA TIMOR LOROSAE
Baguia – Sekretariu Jeral Partidu Fretelin, Mari Alkatiri, duvidas tebes ho programa gorvernu nian atu hari’i uma ba Vunravel sira iha teritoriu tomak.
“Hau la fiar programa ida harii uma lima ba kada aldeia, nee hanesan bahasa Indonesia nia lian karik terlambat, hau la fiar programa ne’e,” hatete Alkatiri ba jonalista bainhira halao atividade konsolidasaun Partidu iha Baguia, Sabadu (14/11).
Nia hatutan programa ne’e karik implementasaun atu manan buka votus deit, tanba bainhira haree iha orsamantu seidauk iha planu ida adekuadu hodi bele implementa iha terenu, autor nebe atu halao programa sira nee xefi suku sira.
“Nee hanesan kuda kareta karik, kuda iha kotuk kareta iha oin, kuda la dada kareta mas dudu fali kareta,” dehan Alkatiri.
Iha fatin seluk xefi Suku Laisorulai, Cipriano Cabral hatete, atu buka fatin no rai nebe mak besik susar halo umaba ema kiak sira.
“Hari uma lima ba Komonidade iha aldeia, ami difisil tebes atu identifika fatin nebe atu uma lima, tanba tuir programa governu nian labele halo ho distansia nebe dook malu,” Cipriano nia propoin atu halo iha ida – idak nia uma fatin, komforme aldeia nebe tama iha kategoria vulnerabel. “se dehan tenkehalo besik malu, signifika tenke buka fatinida prorpio ba ema sira nee,” tenik Cabral.
Xefi Aldeia Waidora Zeferino dos Santos Gusmão hatete, programa harii uma lima vulnerabel sira iha Aldeia laran seidauk halao, tanba seidauk identifika komunidade nebe tama iha kategoria vulnerabel. ”Iha hau nia aldeia laran, ema vuneravel tama iha primeiru faze programa harii uma lima ba vunerabel iha ona, maibe fatin atu halo uma mak sei defisil oituan, kuandu tama iha segundu faze susar ona tamba sira barak los,” dehan Zeferino.
Deputada Fernanda Borges, hatete nia parte seidauk komprende lolos governu nia planu harii uma ba vulnerabel sira iha kada aldeia. Tanba nee presiza hatuur kriteiru ba feto faluk sira, nebe nia numeru iha kada aldeia, dala ruma barak liu.
“Dereitu baziku mak bee mos, ahi, saniamentu, direitu ba aihan laiha nee, maka governu atu implementa programa ida uma 5 nian nee. Hau haree hanesan ita halo para ita hakarak halo uma ba povu maibe, too loron ikus, povu sei la senti diferensa. Tanba laos uma 5 deit, maka ita hadia iha rai nee, ita atu hadia povu Timor-Leste hot-hotu nia vida,” tenik Fernanda.
Deputada PUN ne’e husu ba governu atu halo planu ida diak ba povu tomak iha nasaun nee laos harii uma ba ema ida rua. “Kria kondisoens diak ba povu, oinsa hatama bee mos, oinsa hatama ahi, oinsa kria eskola nebee besik komunidade nia moris no oinsa iha klinika.
Tanba nee hotu iha pakote ida nebee kompletu, kuandu harii fatin ida ba ema atu hela, tenki kria mos kondisoens sira nee hotu.” lay
.
0 comentários:
Enviar um comentário