SUSPENSAUN PERMANENTE AMP

.

Timor Post - Sesta, 15 Abril 2011

Dili - Suspensaun ba membru governu AMP, naba-naban no rame-rame, fo ameasa boot ba AMP sei monu rasik deit.

Julgamentu kazu alegasaun korupsaun hasoru Vise Primeiru Ministru, eis Ministru Negosiu Estranjeiros, José Luis guterres foin mak remata.

Kazu hanesan mosu tan, tribunal bolu Ministru Administrasaun Erdenamentu Teritorio (MAEOT), Arcangelo de Jesus Gouveia Leite.

Lia hirak ne’e hato’o husi deputadu Elizario Pereira husi Bancada Opozisaun FRETILIN iha uma fukun PN, relasiona ho korum ne’ebe mamuk no la vota hodi fo suspensaun ba ministru MAEOT ba iha tribunal.

“Ne’e problema AMP, diak liu lalika iha suspensaun, se suspensaun iha, ba oin membru governu barak sei ba forma iha tribunal no governu mamuk sei monu rasik deit,”dehan nia.

Nia hateten tan, governu kuidadu hela atu fo suspensaun permanente ba ninia membru sira, tanba dadaun ne’e kazu korupsaun halo governu komesa dudu malu.

Kazu José Luis Guterres akontese suspensaun oras sorin, dader ba tribunal nia sai hanesan sidadaun no sai husi odamatan sorin nia asumi kargu nudar membru governu.

Kuandu haruka ba hatan iha tribunal, depende ba maioria hakarak suspende ka lakohi, maibe diak liu kuandu mandatu remata ona mak ba tribunal tanba ne’e imunidade laiha ona.

Relasiona ho karta referensia no. 142/CRM.C?2010TD.BCU ne’ebe diariu ne’e asesu iha PN, fo sai iha loron 23 Fevereiru tinan kotuk, maibe Parlamentu foin mak atu deskute horibainruak (13/4) maibe la konsege, tamba korum la to’o.

Deputada Fernanda lay, Prezidente komisaun I, trata asuntu etika interna hateten, kazu Ministru Arkanzelu modelu hanesan ho kazu Vise PM Jose Luis Guterres nian.

Tanba tuir analiza komisaun I nian, lei rasik falta fase subkrisaun, katak arguidu labele defende ninia an,”se plenaria hakarak propoin politikamente, haruka Ministru MAEOT ba tribunal liu husi dalan politika bele deit,”tenik Fernanda.

Nia hateten, se halarak halo rezolusaun bele halo tanba la’os primeiru esperensia,”ami nia apereser tekniku esplika katak iha relatoriu faze lejislasaun no konstituisaun artigu 34, la fo dalan ba membru governu defende an,” dehan nia.(augosto sarmento)
.