Josefa Parada - Kuarta, 13 Abril 2011 - SUARA TIMOR LOROSAE
DILI-Oras ne’e komunidade iha Sub Distrito Hatu’udo Distrito Ainaro halerik ho folin fos ne’ebe sae makas,tamba halo povu kiik laiha kbi’it labele sosa.
“Ami hanesan povu mukit ne’ebe hela iha area rural laiha kbi’it atu sosa fos,tamba agora ema fan fos iha loja no kios oras ne’e folin karun demais.”Dehan Januario de Araujo nudar komunidade Sub Distrito Hatu’udo ba STL,iha nia hela fatin Hatu’udo,Distrito Ainaro.
Nia haktuir tan katak iha Sub Distrito Hatu’udo ema ne’ebe mak fan fos marka ho 35 kilo ho presu $ 26,ba ema sira ne’ebe sosa tutan husi kios lori ba fan fali iha Suku no Aldeia entaun ne’e sira fan ho folin to $ 30 hanesan ne’e.
Tamba ne’e,nia husu ba Governu liu husi Ministeiru Turismo e Komersiu atu tau atensaun hodi kontrola fos nia foli,atu bele normalize hikas fali fos ne’ebe mak oras ne’e emprejariu no negosiante sira fan ho folin a’as tebes.
Iha fatin hanesan komunidade Sub Distrito Hatu’udo,Mariano Magno de Araujo husu ba Governu atu halo monitorizasaun kada fulan fulan ba fatin importador sira ne’ebe importa fos para hodi hare lansung ,atu nune’e bele identifika lolos problema presu fos ne’e akontese iha parte ida ne’ebe. “Hau sujere ba Governu atu tun lansung ba gundang distributor hodi hare,tamba sa mak problema fos ne’e,sei a’as nafatin,hodi halo povu sira hakilar bebeik,” Mariano akresenta.
Jose Bianco nudar komunidade Sub Distrito Hatu’udo realsa tan katak agora dadaun iha merkado no kios sira presu fos sei sae makas ,Karik problema ne’e Governu la seriu hodi kontrola mak konserteza povu aileba sira iha baze sei infrenta hamlaha, Jose akresenta.
Alende ne’e Xefi Suku Foho Ailiko Eduardo Galhardo hatete ho fos ne’ebe mak folin sae,bele fo impaktu ba povu,basa povu iha area rural ne’ebe laiha kbi’it atu sosa. “Ita hare presu sasan iha merkado komesa sae makas,ne’e signifika katak,ita atu hamate povu rai ida ne’e,tamba realidade povu laiha osan atu sosa”.
Lider komunitaria ne’e mos realsa tan katak Governu nudar regulador presiza halo kontrola makas iha merkaduria nesecidade basiku.Husu ba Governu liu husi MTCI buka metode ne’ebe mak diak hodi identifika indikador inflasaun iha rai laran, Eduardo salienta.cax
.
0 comentários:
Enviar um comentário