PN Suspende Parsialmante Vice PM

.

Josefa Parada - Kuarta, 06 Abril 2011 - SUARA TIMOR LOROSAE

DILI- Reprezentante Povu iha uma fukun Parlamentu Nasional (PN), aprova ona projetu rezolusaun ida ho numeru 62/II kona ba suspensaun Vice Primeiru Ministeru (V-PM) Jose Luis Guterres ho votu maioria hodi suspende Vice PM parsialmente ou temporariu hodi tuir prosesu julgamentu.

“Hau hanoin Parlamentu ohin kumpri ninia obrigasaun, dever konsititusional no aprova ona rezolusaun maske iha diskusaun naruk no disifil, hau mos ulun moras oituan maibe ida ne’e ba iha estadu ninian interese,” dehan Prezidente PN Fernando La Sama Araujo ba Jornalista Kuarta (6/4) iha PN.

Lasama hatutan, deputadu balun la konkorda tamba suspensaun ba Vice PM metade deit, loron ida ba iha tribunal hanesan sidadaun depois bainhira laiha julgamentu fila halao servisu nafatin tamba obedese ba rezulusaun inosensia.

Iha fatin hanesan xefi Bankada Fretelin Aniceto Guterres hatete, kuandu halo suspensaun de kargu ka funsaun ida atu hatan ba prosesu tribunal ninian, ne’e hotu mak foin suspensaun hotu, no prosesu tribunal nia rezultadu bele oin-oin, bele ba kadeia se kazu krimi no bele ema ema absolvidu.

“ Ita la bele inventa tan rebo-rebo, sei ohin suspende aban atu hatan ba iha tribunal hotu lae fali ona, semana oin suspende fila fali tamba nia tenki hatan, iha mundu nebe mak akontese hanesan ne’e, ne’e seidauk iha mundu ida,”dahan Deputadu Aniceto.

Liu husi plenaria Deputadu Jacob Xavier hatete, suspensaun ba vice PM Jose Luis Guterres laos problema nebe fasil, tamba Parlamentu suspende, nia manan, parlamentu sei tau fali nia fatin permanente sei indiminiza.

“Bainhira mak ita bele hatene tribunal desidi efektivamente, problema laos fasil hanesan ita hanoin, problema ita hare sekuensia, suspensaun se PM suspende optimo, tamba nia defende ba primeiru ministru,”dehan Daputadu Jacob.

Iha dabete suspensaun ba vice PM Jose Luis Guterres, reprezentante povu debate rejolusaun rua hanesan projetu rezolusaun numeru 62/II no projetu rezolusaun numeru 64/II, maibe iha votasaun projetu rezolusaun numeru 62/II mak liu ho votu Afavor 38, kontra 16, abstensaun 1 no nulu (vota mamuk) 3, projetu rezolusaun numeru 64/II sai prezudikadu. Timotio Soares.
.