Josefa Parada - Kuarta, 13 Abril 2011 - SUARA TIMOR LOROSAE
DILI-Reprejentante povu iha uma fukun Parlamentu Nasional (PN), Deputada, Maria Exposto, hateten, to’o agora eskola publiku hahu husi Primaria to’o sekundaria sei hasoru difikulta bo’ot teb-tebes ba saniamentu, tanba ne’e PN husu Ministeriu Edukasaun atu halo sintina emergencia ba eskola hotu.
“Hau preokupa teb-tebes, tanba iha eskola barak sei falta saniamentu, nomos halo professor ka estudante balun ba buka fali ema nia uma, ida ne’e ita fo dezafiu bo’ot ba professor no estudante sira,”komenta deputada Maria ba STL iha uma fukun Parlamentu Nasional,Sesta foin lalais ne’e.
Deputada ne’e mos hateten, iha eskola barak sei falta be’e mos,tanba ne’e nia husu nafatin ba ME atu hari netik sintina emergencia ba eskola, tanba labarik balun nebe’e hela do’ok husi area eskola ne’e buka fali ema nia uma.Ida ne’e governu presiza hare.
Entertantu Direitor Eskola Primaria Publiku No 2 Bidau, Amandio Soares, konfirma katak, to’o agora iha sira nia eskola sintina sei limitadu.Alende falta saniamentu,maibe sira preokupa nafatin ba be’e.
“Wainhira ami atu ba deit haris fatin, maibe laiha be’e no saniamentu ne’e.Dala ruma labarik balun hela besik uma, sira halai ba uma, iha ami nia eskola sintina la sufsiente,”tenik nia.
Direitor Eskola Pre-Sekundariu Publiku 10 de Dezembru, Pedrus Alegria,hateten, sintina ne’e inportante tebes ba professor no estudante sira.Wainhira eskola ida laiha saniamentu ne’e problema bo’ot, tanba eskola ne’e iha capital.
“Hau senti iha distritu mak falta saniamentu ne’e diak, tanba besik kedas iha uma, maibe ida ne’e iha capital, kuitadu saniamentu deit laiha,”nia hateten.
Marcelino Nunes nudar estudante terseiru ano,husi Eskola Pre-sekundaria Publiku 10 de Dezembru, lamenta tebes ho problema nebe’e sira infrenta iha sira nia eskola, liu-liu ba sintina, tanba eskola laos sira deit mak uja, maibe estudante sekundaria mos uja hotu.
“Ami nia gedung ne’e laos ami mesak mak uja, maibe estudante sekundaria tama loraik ami tama dader.Tanba ne’e hau husu bo’ot sira tenki resolve netik ami nia preokupasaun nebe’e ami sempre hato’o publiku liu husi media,”dehan Marcelino. sin
.
0 comentários:
Enviar um comentário