PN Aprova Rezolusaun 63/II/2011, “TR Atu Investiga Ana Pessoa”

.

Timor Post - Tersa, 19 Abril 2011

Dili-“Parlamentu Nasionál liu husi rezolusaun No.63/II, fó ona sinal verde ba Tribunál Supremo atu uza rekursu halo inkeretu ba Prokuradoria Jerál da repúblika (PJR), Dra. Ana Pessoa, relasiona ho kazu Lori Vise PM, José Luis Guterres ba Tribunal tanba akuzasaun nepotizmu.

Sinal verde ne’e foin mak fo orseik, segunda (18/4), liu husi votasaun ba rezolusaun No.63/II kona-ba nesesidade salva guarda regular funsionamentu Ministeriu Públiku, ne’ebé hetan aprovasaun 29, Kontra 2, no abstensaun 7.

Desizaun Parlamentu ne’e forteloos, tamba iha mos membru Parlamentu husi Bancada FRETILIN vota a favor.

Deputadu Natalino Do Santos husi bancada CNRT no FRETILIN Mudansa ba Jornalista hateten, razaun rezolusaun ne’e pasa tanba deputadu barak haree presiza hadia Ministeriu Públiku.

“Presiza atu hadia servisu Ministeriu públiku, tanba iha tendensia politiku, komesa tama iha instituisaun ne’e,”tenik deputadu natalino.

Nia hateten, iha kazu eis Ministru Negosiu Estranjeiru, José Luís Guterres mesak deit no ema sira seluk ne’ebe envolve iha prosesu ne’e la bolu sai arguido,”(nia Jose Luis-red) hetan konesementu deit, maibe to’o ikus nia mak sai fali arguido, entaun arguido seluk sei livre,”nia dehan tan.

Deputadu Adriano Nasimento husi bancada PD no Aderito Hugo husi Bancada CNRT, kinta semana kotuk louva partido FRETILIN, tanba konsege lori ema sira ne’ebe iha ninia governasaun kaer ukun, ba hatan iha Tribunal, pasu ida ne’e, tuir deputadu sira ne’e pozitivu atu fo matadalan ba AMP atu halo tuir.

Resolusaun 63 bloku AMP halo nudar obrigasaun politika tanba iha kaju ne’e Jose Luis hetan.

Entertantu Prezidente Partidu FRETILIN, wainhira konsolidasaun hateten, resolusaun ne’ebe parlamentu halo hasoru PJR ne’e kontra lei.

“Ne’e viola lei, viola prinsipiu estadu de Direitu Demokratiku no prinsipiu separasaun de poder politika, orgaun soberania,”Tenik Lu Olo.

“Se iha akujasaun ne’e iha buat seluk, tribunal automatikamente halo desizaun, Parlamentu laiha kompetensia akuza ou julga ema liuhusi rejolusaun,”Lu Olo dehan.

Nia hatutan, Timor leste niania sistema oin seluk, iha nasaun demokratiku, iha separasaun de poder maibe iha interpedensia balun entre orgaun soberanu, lasignifika parlamentu nasional aprova fali resolusaun ida hodi hatun fali prokuradoria ida.

Lu mos kestiaona, Maioria AMP hatene ka lae, nia fiar katak tribunal sei la konsidera ida ne’e, hanesan interferensia orgaun politika ida ba tribunal ninia kompetensia.

Nia minimize, dala ruma triste, politika deit sei la resolve, tenke hatene lei uituan, maioria AMP uza Parlamentu halo rezolusaun ida halo akuzasaun,”hau fiar Tribunal sei la submete ba desizaun Parlamentu nian, hodi husu investigasaun ba Ana Pessoa, pares eke Ana Pessoa hamnasa tan ba maioria AMP,”Lu hatutan.(agusto Sarmento)

.