Josefa Parada - Segunda, 11 Abril 2011 - SUARA TIMOR LOROSAE
DILI-Governu liu husi Ministeriu Turismu Comerciu no Industria (MTCI), kontinua nafatin halo intervensaun direita relasiona ho fos ne’ebe mak aloka iha kada distritu.
Lia hirak ne’e hato’o husi, Gestor MTCI, Sancho da Silva Sesta (08/4) afirma katak, kona ba Intervensaun Governu nian relasiona ho presu ne’ebe karun oras ne’e dadaun Governu mos halo ona intervensaun direita hodi halo iha kada distritu hanesan Distritu Oe-cusse, Maliana, Manufahi, Covalima, Ainaro no lautem.
Tamba ne’e tuir Sancho katak sira halo kada distritu ida sira kalkula fos ho 100 toneladas maibe sira halo rotasaun ne’e kada intervensaun ho 50 toneladas iha distritu ne’ebe maka sira identifika. Tamba ida ne’e hanesan halo rotasaun.
Nia haktuir katak, atu halo intervensaun ba primeira faze ho 50 toneladas depois ba segunda faze ho 50 toneladas. Ida ne’e laos dehan katak atu hare ba horariu ne’ebe mak iha maibe kuandu iha informasaun ruma ba Distritu ka Sub-Distritu presisa intervensaun ministeriu halo direitamente kedas.
“Semana-semana ami halo intervensaun ba kada Distritu ne’ebe identifika tiha ona. Ba kada Distritu antes sira implementa intervensaun sira sei hala’o konsultasaun ho polisia ho Administrador Distritu. Hodi hatene atu hala’o alokasaun ba iha fatin ne’ebe,”tenik Gestor MTCI ne’e.
Nia esplika, atu identifika fatin ne’e depende ba iha autoridade local, tamba ne’e tenke halo konsultasaun ho sira. Purexemplu bainhira sira ba iha Manufahi sira husu para halo iha Same vila turiskai ho alas.
Tuir planu, iha Covalima ne’e ba iha fohorem, Fatuberliku no Suai vila maibe to’o iha suai sira halo konsultasaun deside katak fa’an iha suai vila, zumalai Saleletarafa, Tilomar, Camanasa, Suai Loro, matai no asumeta.
Nia esplika liu tan katak, kuandu faze primeiru halo ona atendementu iha ne’e, faze segundu bele halo atendementu iha fatin segundu. Depende ba konsultasaun ho desijaun husi autoridade local. Tamba ministeriu ba halo intervensaun laos ba ministeriu sira mesak fa’an direitamente maibe ministeriu halo konsultasaun ho autoridade local hodi deside.
Iha parte seluk, Domingas de jesus komunidade husi Distritu hatete, nia parte sente diak bainhira Governu halo intervensaun direita ba iha distritu. Ho dalan ne’e bele garante ona sira hodi fasilita sira nia aihan loron-loron nian.
liafuan hanesan husi estudante Miranda Soares hatete, Governu semana-semana halo intervensaun direita kona ba fos ne’e signifika ona katak Governu iha duni planu ne’ebe diak hodi ajuda povu nia moris iha baze.
Nune’e komunidade Distritu, Adalberto de Araujo konfesa katak, intervensaun husi Governu ne’ebe kontinua halo ne’e kapas tebes tamba bele ona garante sira nia aihan loron-loron nian. ve
.
0 comentários:
Enviar um comentário