Lucio Neves Coreia Hetan Turtura Oknum PNTL, PN Lamenta

.

Josefa Parada - Kuarta, 13 Abril 2011 - SUARA TIMOR LOROSAE

DILI–Polisia Nasional Timor Leste (PNTL), nebe foin reasumi hikas poder seguransa husi Polisia Nasoens Unidas (UNPol) iha 26 Marsu liu ba, komesa buradu ona ho asaun membru sira nian. Espektasaun povu nian ba PNTL atu sai lutu sira nian, sei duvidas tebes, tanba membru polisia sira balun seidauk profesionaliza iha halao knar, balu sei liman katar hodi uza violensia rezolve problema.

Hanesan akontese daudauk ba vitima Lucio Neves Coreia iha loron hirak liu ba, hetan turturasaun husi oknum Polisia Nasional Timor Leste (PNTL) balu iha Becora. Seidauk hatene lolos motivu husi turturasaun nee, maibe asaun liman katar ajenti seguransa ida nee nian ba vitima Lucio, hetan reazen makaas husi deputadu sira iha uma fukun PN.

Deputadu David Diaz Ximenes husi bankada Fretilin, konsidera kazu nee grave noo husu Meja Parlamentu Nasional atu buka meius rezolve kazu nee.

Vitima Lucio Neves Coreia, tuir Deputadu David iha okupasaun Indonesia hetan turturasaun husi tropas Indonesia, tanba deit halo boikota ba eleisaun jeral Indonesia iha 1997, maibe turturasaun daudauk laiha motivu ida, tanba nee presiza fo atensaun. “ Hau lamenta teb-tebes, lolos ne’e hau lori deit dokumentus ne’e ba komando, hau mai hakruk hakneak ba PN ne’e para rezolve, David Dias Ximenes levanta kazu nee liu husi plenaria PN, Tersa (12/4).

Iha fatin hanesan Deputadu Riak Leman, hatete membru PNTL ida bainhira halo halo asaun ruma, dala ruma iha nia motivu, tanba nee lalika kondena deit, maibe presiza buka hatene uluk.

“ Ita Timor ne’e hanesan ne’e, kuandu ita nia autoridade sira no ita nia polisia sira nee ema toma konta ba seguransa mamar, provokasaun bar-barak deit,“ hatete Riak Liman.

Vice Prezidente Komisaun B PN, Paulo de Fatima Martins hatete durante ne’e iha lamentasoens barak husi komunidade ba atuasaun membru PNTL sira nian. Lamentasaun hirak nee mosu tanba medidas nebe polisia foti la tuir prosedimentu estandar, ne’e duni plenaria tenke fo hanoin ba Ministeriu kompetenti atu fo hanoin ba polisia sira oinsa atu proteze komunidade nia interese.

“ Husu Meja atu fo hanoin ba Ministriu kompetenti atu fo hanoin ba polisia sira se bele halao sira nia knar lolos hodi proteze inklui defende komunidade nia interese,” dehan Paulo.

Vice Parlamentu Nasional, Maria Paixao da Costa, husu komisaun B no mos Komisaun A atu hola provedensia ba kazu ne’e hodi haree no buka rezolve tuir prosidementu nebe iha. Jay

.