Kresimentu Ekonomia, Sa’e Kauza Inflasaun

.

Josefa Parada - Kuarta, 13 Abril 2011 - SUARA TIMOR LOROSAE

DILI-Ministra Finansas (MF), Emilia Pires hateten katak kresimentu ekonomiku sa’e tamba fatores kauza inflasaun.

Lia hirak ne’e hato’o husi, MF Emilia Pires iha nia diskusaun ba Membru Governu tomak no Diretores iha Salaun Nobre Ministeriu dos Negocios Estrangeiros Segunda (11/4).

Iha diskusaun MF, Emilia haktuir katak, fatores kauza inflasaun tamba definisaun ba inflasaun hanesan presu sasan hotu-hotu sa’e iha ekonomia nia laran durante periodu ida.

Puriexemplu fos fa’an iha Dili oituan ka ki’ik nivel ne’ebe ema hakarak sosa ka buka.

Kauza inflasaun tamba kapasidade produsaun limitadu, restrisaun oferta no bottlenecks mos limita kapasidade atu atende demanda ba sasan oi-oin.

Emilia haktuir tan katak, inflasaun ladiak tamba hamenus valor osan nian hanesan osan $1 uluk bele sosa hudi sasuit ida, agora presisa $1.10. wage inflation hanesan salariu aumenta maibe produtividade la sa’e, hamenus kompetetividade nomos inflasaun redus kresimentu real iha ekonomia.

Iha sorin seluk, estudante Agosto Belo haktuir tan katak, kresimentu ekonomia agora sa’e kauza faktores barak hodi halo modalidade ema nian atu sosa sasan ruma mos labele.

“Sebele Governu buka mekanismu oinsa hodi hare ba asuntu ida ne’e, tamba ne’e importante ba ema ida-idak nia vida moris,”informa estudante ne’e.

Liafuan seluk husi, negosiante kiik Maria da Conceicão konfesa katak, atu garantia nesesidade baziku iha vida moris presisamente ekonomia tenke diak. Atu nune’e iha future ema hotu-hotu moris iha vida negosiu nian ho diak.

Lamentasaun hanesan husi juventude Antonio Lemos, maske hanesan nasaun ne’ebe kiik Governu presisa kria kampu de servisu ba desempregadu sira, tamba ho dalan ida ne’e bele sustentavel ekonomia iha rai laran.

“Ita hare deit agora timor oan barak mak desempregadu halo nusa nia hetan ekonomia diak sekarik nesesidade baziku kontinua sa’e makaa’as,”tenik juventude ne’e. vey
.