Horta: “Avo Xavi Nia Kondisaun Saude La Diak”

.

Josefa Parada - Segunda, 11 Abril 2011 - SUARA TIMOR LOROSAE

DILI-Prezidente Republika, Jose Ramos Horta hatete, Proklamador Independesia Tinan 1975, Francisco Xavier do Amaral nia kondisaun saude agora la diak tanba hetan moras kankru.

“Avo Xavi nia saude la diak tanba nia hetan moras kankru no halo dadauk Demo Terapia, maibe ita la hatene nia kondisaun nee oinsa, enkuantu hau hatete nia saude la diak,”deklara PR Horta ba jornalista liu husi kon-ferensia imprensa iha Aeroportu Nicolao Lobato Cumoro, hafoin fila husi nia vizita ba estranjeiru, Sesta (8/4).

Tratamentu Avo Xavi iha Singapura katak PR Horta, nia akompaña ho doutor Timor oan nebee foin remata estudu iha Cuba.

“Doutor Timor oan nee husi Cuba, nebee foin simu gradusaun iha fulan ida liu ba. Hau hare diagnostika nebee sira halo ba nia iha Dili, hanesan mos ho diagnostika nebee doutor sira iha Singapura,” hatete tan nia.

Premiadu Nobel ba Paz 1996 haktuir, performance joven doutor nee iha Singapura halo nia orguillozu, tanba nia hatene buat hotu-hotu, nee hanesan diak ba nia tanba henesan ita deside ema ida tan ba iha Ospital modernu. “Enkuantu Hau hare susesu ida diak tebes kolaborasun sira nian iha Singapura,” Horta haktuir.

Relasiona ho kondisaun saude Eis Prezidenti TL Francisco Xavier, Prezidenti Parlamentu Nasional Fernando La Sama husu ba povu Timor-Leste atu reza ba Maromak hodi husu para haraik fali saude diak, atu nunee bele goza ukun aan ida nee.

“Hau husu ba povu Timor tomak atu reza nafatin ba Maromak hodi husu fo fali saude diak ba Avo Xavi, atu nunee nia mos bele goza independensia ida nee,” La Sama apela.

Akademista Universidade Nasional Timor Loro Sa’e, Silveiro da Conceição hatete, hanesan ema Timor Oan nia sinti tristi tanba alende Proklamador, nia mos hanesan prezidenti dahuluk, no fo nia aan tomak hodi luta ba ukun rasik aan.

“Hau senti tristi tanba bainhira rona katak Avo Xavier nia kondisaun agora la diak, tanba hanesan ema Timor bele dehan nia maka kaer rai Timor nia talin. Maibe ita l bele halo buat ida, ita so reza deit ba Maromak para haraik fali isin diak no saude diak para ita nia Proklamador nee bele fila mai hamutuk fali ho ita, hodi dezenvolve ita nia nasaun nee ba oin,” Silveiro espera.

Liafuan henesan hatoo husi Xefi Aldeia Becoi Sucu Lahane Oriental Jose Barros, nebee husu ba doutor Timor Oan neebe agora akompaña Avo Xavi halo tratamentu iha Singapura, atu haree didiak no fo tratamentu nebee diak ba Avo Xavi, atu nunee nia bele mai hamutuk fali ho nia reinu ka populasaun iha Timor ho isin diak no saude diak. Jin
,