Governu TL Fo Donasaun Solidariedade Ho Montante US$500.000 Ba Japaun

.

Josefa Parada - Segunda, 04 Abril 2011 - SUARA TIMOR LOROSAE

DILI-Governu Timor Leste liu husi Emabaixador Timor Leste ba Japaun, Domingos Sarmento Alves, Sesta (25/3) liu ba, hato’o ajuda donasaun finanseiru husi governu ho povu Timor Leste nian ba governu no povu Japaun liu husi Vise Ministra Parlamentar ba asuntu Negosiu Estranjeirus, Sra. Makiko Kikuta.

“Embaixador Alves hodi governu Timor Leste nia naran hato’o ninia sentimentu kondolensia ba estragus nebe mak kausa husi rai nakdoko mak akontese iha Tohoku-Oceano Pasifiku, no mos esplika katak depois de rai nakdoko akontese, governu TL imediatamente halo enkontru gabinete emergensia, konvida mos Embaixador Japaun ba TL interinu hodi partisipa iha enkontru ne’e,” dehan Embaixador Domingos Alves liu husi komunikadu imprensa nebe diariu ne’e simu iha Kinta (31/3).

Iha enkontru ne’e sira diskusaun klean hodi buka meius oinsa atu oferese asistensia nebe mak persiza ba Japaun. Embaixador mos hateten nudar rezultadu diskusaun refere, governu TL deside ona hodi fo doasaun solidariedade ho montante 500.000 dolares amerikanu no entrega kopia avisu de determinasaun husi governu TL ba Sra. Kikuta.

Iha biban ne’e, Vise Ministra Kikuta hodi governu Japaun, povu no sira nebe mak sofre husi rai nakdoko nebe mak akontese foin lalais ne’e nia naran espresa ninia apresisaun klean ba donasaun nebe mak sira simu ona.

Kikuta repete tan ninia agradesementu ba TL nebe mak konvoka ona enkontru gabinete emergensia ba asistensia imediata hafoin rai nakdokoliu husi fahe sentimentu ho sira nebe mak sofre husi rai nakdoko, hanesan mos ho mensagem simpatia hirak nebe mak simu husi dignitaries TL nian inklui Presidendi Republika Jose Ramos Horta, Primeiru Ministru Kay Rala Xanana Gusmao, Presidenti Parlamentu Nasional Fernando Lasama de Araujo no mos dignitarius sira seluk nebe mak fo sira nia asinatura iha livru kondolensia iha Embaixada Japaun iha TL.

Liutan, Vise Ministra Kukita esplika kona ba situasaun atual iha area nebe mak afeita husi rai nakdoko no esforsu hirak nebe mak governu Japaun halo ona no mos autor relevante sira. “Esforsu boot halo ba prioridade baziku hodi hakalma situasaun iha Fukushima Dai-Ichi Usina Nuclear,” katak Kukita.

Iha resposta, Embaixador Domingos Alves afirma katak nia hakarak atu hato’o agredesementu klean ba parte hirak nebe mak halo ona esforsu makaas hodi sakrafika buat hotu inklui mos sira nia vida hosi ajuda hakalma Usina Nuclear ba ema hotu-hotu nia moris inklui mos Embaixador Alves rasik.

Entertantu, Embaixador Japaun ba TL, Iwao Kitahara liu husi karta especial nebe hato’o ba Direitur STL Media Group, Salvador J. Ximenes Soares hatete nia hodi governu no povu Japaun nia naran hato’o agredesementu klean ba governu no povu TL nebe hato’o sira nia sentimentu kondolensia ba estragus nebe mak kausa husi rai nakdoko mak akontese iha Tohoku-Oceano Pasifiku, 11 Marsu 2011.

“Ami la haluha simpatia, motivasaun no mensajem simpatia no ajuda donasaun finanseiru husi governu no povu TL. Buat diak sira ne’e hotu ami labele deskrebe,” dehan Embaixador Kitahara. */mik
.