Josefa Parada - Segunda, 11 Abril 2011 - SUARA TIMOR LOROSAE
DILI–Partidu Frente Revolusionariu de Timor-Leste Independente (Fretilin), konsidera eleisaun tinan 2012 mai nee hanesan momentu konfirmasaun vitoria ba partidu historiku nee. Tamba desde uluk, Fretilin manan nanis, no sei manan nafatin too ohin loron.
“Ami Fretilin manan desde uluk kedas, laos foin agora. Tamba nee, tinan 2012, sai tinan konfirmasaun fila fali katak Fretilin manan tiha ona,” dehan Koordenador Komisaun Politika Sub Distritu Dom Aleixo, Inacio Pinto ba jornalista sira iha Lemkari, Sabadu (9/4) wainhira hola parte iha programa konsolidasaun partidu.
Iha fatin henesan, Sekretariu Jeral Rejiaun II, Jose Manuel Soares haktuir, Sub Distritu Dom Aleixo tama ona ba faze konsolidasaun daruak hodi hametin, hatutan no prepara militante sira hasoru eleisaun 2012.
“Ita organiza vitoria no hetan ita nia vitoria iha 2012, nee mak ita agora dadaun halo konsolidasaun. Ita tenki prepara no analiza, tamba tinan 2012, tinan konfirmasaun vitoria ba partidu Fretilin, basa Fre¬tilin manan nanis tiha ona,” dehan Jose.
Nia hanoin, eleisaun 2012 nee atu eduka ema hotu hodi hanoin dezenvolvimentu nebee Partidu Fretilin propoen ba membru ida-idak nia laran.
Entretantu Sekretariu Jeral Partidu Fretilin, Mari Alkatiri hatete, konsolidasaun partidu nian seidauk too rohan. Fretilin halo servisu ho reajustamentu, hahuu husi aldeia too iha nasional. Moto Fretilin nian ba tinan 2011 mak prepara vitoria no organiza vitoria.
“Ita tenki prepara aan atu manan. Ita tenki organiza aan hodi manan vitoria, tamba vitoria la monu husi Lalehan mai. Maromak rasik sei la fo vitoria, see ita la servisu,” Alkatiri fo hanoin hodi hatutan mos katak tinan nee, nudar tinan importante tebes ba Fretilin atu atinji vitoria.
Tuir Militante Fretilin, Jose Soares, Fretelin nudar partidu nebee iha responsabilidade ba nia hahalok no responsabilidade ba povu Timor. Fretilin la mobiliza povu atu halo violensia, tuda fatuk, maibe atu halo no hatudu hahalok nebee diak, dame no paz ba nasaun nee. “Ami nia preparasaun ba kongresu, no preparasaun ba eleisaun tinan oin mai, no ami garante sei manan iha eleisaun tinan 2012, tamba tinan nee sai tinan konfirmasaun ba ami partidu Fretilin,” Jose dehan.
Nia husu mos ba joventude iha sub distritu seluk, atu fahe informasaun ba malu hodi konsiente malu katak joventude Fretilin labele sai tan objetivu ema nian hodi sobu rai ida nee, maibe tenki prontu atu defende rai ida nee.
Observasaun STL nian iha Lemkari hatudu katak, konsolidasaun Partidu Fretilin hetan partisipasaun maximu husi militante militante no simpatizante partidu nian iha area nebaa.
PSMF Tuir Filizofia Fretilin
Fretilin oras nee harii organizasaun nebee hanaran Profesional Saude Militante Fretilin (PSMF) hodi fo tratamentu saude diak liu tan ba povu nebee hetan moras.
“Profesional saude nee kompostu husi dotores. enfermeirus, parteiras, teknikus laboratoriu sira, nebee sei servisu iha area saude. Sira mos pertense ba militante Fretilin, organiza aan hodi bele halao servisu iha area saude tuir filozofia Fretilin nian,” dehan Sekretariu Jeral Fretilin, Mari Alkatiri ba jornalista sira, Sabadu (9/4) iha CCF Fatuhada-Dili.
Alkatiri garante, ema hirak nee sei servi ho etika no respeita ema nia privasia. Prosesionais sira nee organiza aan para Fretilin fila fali ba poder, atu hadia servisu saude sai diak liu tan. Fretilin mos sei organiza aan iha area seluk hanesan agrikultura, edukasaun, no infraestruturas.
“Lakleur tan, ita bele haree centru saude hira mak tempu Fretilin nee hari iha Timor-Leste tomak. Sira nebee ukun agora, seiduk harii ida. Ita bele haree buat sira nee hotu,” Alkatiri dehan.
Iha okaziaun hanesan, Koordenador Interina Rui Maria de Araujo hatete, oras nee dadaun rejistu nebee iha hamutuk ema nain 300 resin, mai husi distritu hotu-hotu. Reprezentante husi distritu sira, liu-liu ema saude nebee mak sai ona militante partidu nian.
“Professional saude hanesan ema sidadaun, iha mos ninia direitu politiku, hodi bele eskoila partidu ida nebee mak nia hakarak atu sai militante hodi bele halao kontribusaun ba dezenvolvimentu rai ida nee nian,” Rui hatutan.
Nia esplika, harii organizasaun PSMF ho objetivu halao servisu hanesan professional saude tuir valores no prinsipiu nebee Fretilin defende hanesan estadu direitu demokratiku, halo militante sira bele moris diak liu tan no bele kontribui ideias ba Komite Central Fretilin ou instituisaun nebee relevante iha Fretilin nia laran.
“Sai membru PSMF laos atu sevisu deit ba Fretilin, sai membru hanesan opsaun politika ida maibe servisu hanesan infermeira, doutur, parteira hodi fo atendementu ba ema hotu, la haree ba koor partidaria no relijiaun,” Rui garante.
Nunee mos Vice Koordenador Partidu Fretilin Distritu Viqueque, Teotonio Sarmento da Silva hatete, hari organizasaun ida nee ho intensaun prepara sira nia aan atu tau neon hamutuk hodi hadia diak liu tan saude no mos hodi kontribui ba dezenvolvimentu iha rai laran.
“Ita harii organizasaun atu hadia, laos atu sobu lae. Ita harii organizasaun ho objetivu prinsipal mak atu hadia. Iha tempu klandestina, forsa boot mak infermeiru sira, tamba nee atu hadia diak liu tan,” Teotonio haktuir.
Sekretaria Interina Lidia Gomes hatete, durante diskusaun harii PSMF hetan partisipa husi Distritu Lospolos, Viqueque, Bobonaro, Liquiça no mos Distritu Baucau, nebee komesa husi loron 15 Dezembru 2010.
“Ita hein katak wainhira hetan ona formalizasaun iha partidu nia laran, PSMF sei ativu liu tan kontribui ba dezenvolvimentu Timor-Leste tuir prinsipiu folizofiku ideoloziku Fretilin nian,” dehan Lidia hodi apela ba membru militante Fretilin nian atu fo dedikasaun nebee dinamismu, no ida-idak bele sai ezemplu diak hodi bele lori Fretilin prepara no organiza PSMF diak liu tan iha futuru. Lay
.
0 comentários:
Enviar um comentário