EDTL Suai ‘Mate Lakan’ Vice Ministra Hanjam Konsidera Nudar Problema Nasional

.

Josefa Parada - Kuarta, 13 Abril 2011 - SUARA TIMOR LOROSAE

DILI-Vice Ministra Saude (MS) Madalena Hanjam hateten, problema ne’ebe doutor Cubano sira infrenta bainhira halao servisu iha Hospital Referal Suai (Distritu Covalima) tamba EDTL Suai mate lakan bebeik, konsidera nudar problema nasional.

Tamba ahi mate lakan bebeik, doutor Cubano sira labele fo lisaun ba estudante medicina sira ne’ebe halao hela estagiu iha Suai. “Ida ne’e hanesan problema nasional,” katak Vice MS Hanjam ba STL hafoin partisipa iha Yellow Road Workshop Prioridades Nasionais ba Tinan 2012 iha Salaun Nobre do MNE, Pantai Kelapa, Dili, Segunda.

Hatan ba problema ne’e, nia dehan, nudar Vice MS, nia sente defisil atu kontrola ba to’o baze (distritu). Maibe MS kria tiha ona sistema servisu ba iha distritu. Iha neba, iha tiha ona directora, iha osan ba sira. Pasta mutin mos tau tiha ona iha distritu. Tamba ne’e nia parte sei ha’re ba jestor no finanseiru iha ne’eba. “Tansa mak orsamentu iha distritu seluk bele akumula buat sira ne’e hotu (inklui electrisidade). Tanba sa mak iha Suai, Distritu Covalima, ida ne’e sei problema hela deit. Entaun tenki ha’re ba ema sira ne’e nian servisu. Sira servisu ho boa vontade duni ka lae,” afirma Vice Ministra Hanjam.

Iha Uma Fukun PN, deputadu Mateus de Jesus informa katak, laos deit problema ahi mate lakan. Doutor Cubano sira mos infrenta bee mos. Kanaliza bee mos ba Hospital Referal Suai, dala ruma maran. Bainhira electrisidade lakan, maka bee sai. Kuandu mate, maka bee mos maran. Bazea ba informasaun ne’ebe nia simu via telephone husi estudante medicina iha Suai, tamba deit problema ahi mate lakan bebeik, sira nia prosesu aprendizijen para tiha loron tolu ka ha’at. Sira la hetan lisaun husi doutor Cubano sira.

Vise Prezidenti Komisaun F-PN (asuntu Saude, Edukasaun no Kultura) Francisco Jeronimu hateten, nia parte sei hato’o problema ne’e ba MS para foti medidas lalais. Deputadu Antoninho Bianco reforsa tan. “MS tenki ha’re sasan sira ne’e ho diak tanba Timor persiza mediku. Para aban bain bele aloka ba iha suku-suku. MS labele tuur nonok”. Lia
.