Deputadu José Teixeira : “FRETILIN Sei Monitoriza Nafatin Servisu Governu”

.

Jornal Nacional Diário - Sesta, 15 Abril 2011

Dili-“”Ami sempre monitoriza nafatin ba servisu governu iha area hotu-hotu. Hanesan infraestrutura baziku, Estrada, escola, eletrisidade nia, tamba nudar opozisaun ida ita nia papel importante tebes,”dehan José Teixeira, deputadu bancada FRETILIN iha Salaun Fundasaun Oriente Kinta (14/4) horsehik. Nia hatutan katak tuir FRETILIN nia hare funsionariu sira osan aumenta maibe oras servisu hamenus, Programa foun poco-poco mosu.

Membru parlamentu ne’e mos dehan tan problema sempre mosu hela deit iha area infraestrutura baziku tamba ne’e FRETILIN akompanya sira nia programa, aban bainrua iha dia 20 de Maio agora FRETILIN halo eleisaun dereita husi militante FRETILIN ba lideransa partido nian,”Hau dehan ida ne’e eventu ida ne’ebe importante ba FRETILIN tanba eventu ne’e laos istoriku deit ba Timor Leste maibe istoriku iha rai azia tomak.

Nia hatutan eleisaun direita ida ne’e iha rai ida ne’ebe halo ho prosesu iha tinan aat uluk liu ba iha nasaun estados Unidos da America utilize sistema ida ne’e tamba sira mos adopta sistema demokrasia hanesan ita adopta dadauk ne’e.

“Atu kaer ukun iha ita nia rai doben ida ne’e tenki liu husi povo nia hili iha eleisaun laos akontese iha 2006 halo demonstrasaun obriga ema tun husi nia kargu depois imi sae fali, uza maneiras soran povo, joventude atu nune’e imi bele kaer ukun,”dehan Teixeira.

Iha ne’e konesidu ona katak iha relatoriu ne’ebe hakerek husi reprezetante Sekretariu Jeral ONU iha Timor Leste katak opozisaun FRETILIN iha kontribuisaun ba estabilidade ba rai ida ne’e bo’ot teb-tebes tanba ne’e ohin loron halo Timor Leste sai estado.

Nia dehan tan wainhira iha 31 de Dezembru 2009, Primeiru Ministru de fakto Xanana Gusmão ba tur hamutuk ho lideransa FRETILIN iha Farol, hodi komemora loron mate ‘Aswa’in’ Nicolao Lobatu, Sekretariu Jeral FRETILIN hateten ba Xanana katak, dekada ba paz, estabilidade no dezenvolvimentu.

“Tinan 2010-2020 FRETILIN halo buat hotu atu asegura katak tinan sanulu ne’e sei sai tinan sanulu ba paz, estabilidade, dezenvolvimentu ba povu Timor leste tamba dezenvolvimentu kuandu la lao ita laiha paz no estabilidade.(Cal)
.