Aviao ONU Monu Iha Afrika, “Uniku” CJITL Nia Web Designer Mak Moris Hela

.

Written by Arsen - CJITL Afrika - Wednesday, 06 April 2011

CJITL Kinshasa, Segunda ne'e (4/4), Aviaun ONU ho marka CRJ 300 jet ida, monu hafoin tenta atu tun iha aeroportu N'Djili kapital Kinshasa, Republika Demokratika Congo, Afrika no hamate ema nain 32 uniku CJITL nia web designer mak salva husi asidente ne'e.

Aviaun nebe semo regularmente hosi Kisangani (RDC) - Kinshasa (RDC) ne'e tula passangeru nain 29 no hamutuk ho kru nain 4.

CJITL ninia web designer, Armindo de Jesus nia vida konsege salva husi asidente aviaun monu ne'e.

Tuir mai CJITL ninia webmaster haktuir ba redasaun CJITL online iha Dili, Kuarta feira madrugada ne'e.

"Tuir los hau sa'e aviaun ne'e, tanba normalmente aviaun semo hosi Entebbe (Uganda) tenke liu hosi Kisangani (Congo), Mas sorte hau nian tamba ami ema muda fali hau ba aviaun ida ne'ebe semo direitamente ba Kinshasa", hateten Armindo de Jesus ne'ebe mak sai hanesan CJITL nia webmaster durante tinan ha'at (4) ona ne'e.

Oras ne'e dadaun Armindo de Jesus servisu mos nu'udar Webmaster iha MONUSCO (Nasions Unidas ba Stabilizasaun nian iha rai RDC).

"Ami retreat ba iha Uganda, ne'ebe aviaun ida ami sa'e ne'e mesak ami seksaun ida deit", CJITL Web designer hatutan tan.

Timor oan sira ne'ebe servisu iha rai Congo no misaun ONU nian iha Afrika laran triste tebes bainhira rona katak aviaun monu ne'e ho Timor oan ida, no sira komesa buka tuir Timor oan se mak semo ho aviaun ne'e.

Agustinho de Araujo hosi Ainaro ne'ebe servisu mos iha ONU iha Congo komesa manda SMS ba kolega sira tomak iha rai Congo laran no Uganda katak Armindo de Jesus mos tuir hotu aviaun ne'e no sira komesa kontaktu Armindo (CJITL web designer).

Sira tenta nafatin telefone CJITL nia Web designer ne'e maske telefone fora de area kobertura. Sira triste tebes.

Iha lorokraik oras Congo tuku 4 minutu 4, Agustinho telefone ba Armindo no konsege liga duni katak Armindo moris.

“Iha oras tuku 4 lorokraik tempu Congo nian, ami tun iha Aeroportu N'Djili, Kinshasa, kuando hau tun hosi aviaun kolega Indonezia oan ida nebe servisu mos iha aeroportu mai hakuak hau no tanis hodi hatete "Bang kamu lucky, selamat ya!!!!" hau la kompriende tanba saida? Depois hau husu, saida mak akontece? nia hatete "ntar ku ceritain masuk aja ke dalam" Armindo ne'ebe mai husi distritu Suai ne'e konta tuir.

“Loron ida ne'e 4/4/2011 la hanesan loron sira seluk iha aeroportu, hau rasik hakfodak no laiha idea saida mak akontese.,Lakleur la to'o minutu 5, hau simu telefone husi hau nia kolega sira konfirma katak hau sei MORIS." Armindo de Jesus esplika ba CJITL online iha Dili.

Timor oan sira iha rai Congo komesa kontente mais laran susar nafatin tamba sira nia maluk barak mak lakon no mate iha acidente ne'e.

Tuir reportajen CJITL husi Congo katak, asidente ne'e halo aviao ho marka ONU ne'e rahun no vitima na'in 8 ne'ebe mate to'o agora seidauk identifika sira nia isin mate tanba rahun hotu no agora sei hala'o hela autopsia. (Arsen/CJITL Afrika)

.