Arao: Hau Lahatete Governu Gasta Osan Arbiru

.

Josefa Parada - Sesta, 08 Abril 2011 - SUARA TIMOR LOROSAE

DILI– “Hau lahatete governu gasta osan abiru deit, maibe hau dehan estrada aat bebeik, tanba falta rekursu umanu nebee kualifikadu hodi garante kualidade estrada iha Dili laran,” dehan Arao Noe ba STL.

Tuir Arao katak engeneiru iha kualidade rekursu umanu sufisiente, bele halo planu ne’ebe diak.

Tuir Deputadu Bankada CNRT nee, katak, Governu iha orsamentu atu halo manutensaun ou halo Estrada foun, maibe tanba rekursu lakualifikadu halo estrada nee durasaun badak deit. Hanesan ita fakar osan deit, maibe kualidade lagarante nia sustenibilidade. “Ita taka kuak lakleur aat fali,” dehan Arão.

Deputadu nee husu ba ministeriu kompetente atu responsabiliza kualidade estrada. Sekretariu Estadu Obras Publika tenke iha planu ida kediak no desin diak hodi garante kualidade estrada.

“Se ita nia engeneiru iha kualidade rekursus humanus sufisiente nia bele halo planu ne’ebe diak,”Arão komenta.

Deputadu ne’e reforsa tan katak, kompania nebee halao projeitu estrada tenke ezekuta ho kualidade. Kualidade diak mos tuir Arao presija halo monotorizasaun hodi bele garante kualidade projeitu nee. “Ita tenke hare hotu ida ne’ebe mak halo sala, tamba ne’e mak komisaun agora hala’o monitorizasaun hodi detekta frakeza sira nee. Iha parte balun Ita nia frakeza iha rekursus humanus,”hatutan deputadu ne’e.

Kona ba Estrada la to’o tinan a’at deputadu ne’e husu ba populasaun mos tenke hatene tamba durante ne’e osan barak Governu fakar hodi rezolve krize 2006 ba IDPS hodi bele rekopera fali sira nia uma.

“Osan ne’ebe barak liu ita fakar ne’e, fakar iha governasaun ne’ebe aloka para rekoperasaun estabilidade. Hau hakarak focus katak durante tinan 3 governasaun AMP ninian focus ba rekoperasaun estabilidade liu husi IDPS sira,”Arão haktuir tan.

Iha parte seluk deputadu Mateus de Jesus, servisu monta no sobu ne’ebe mak governu halo iha Estrada kapital Dili nian ne’e, hatudu momos ba ema hotu katak Governu laiha planu wainhira atu halao servisu oan ida. Ne’e mak nia rejultadu hanesan ne’e, ikus mai tenke sobu fali hodi monta foun fali.

komunidade Adelino da Silva rekonhese, maske governu fakar osan bar-barak maibe sedauk hatudu rezultadu didiak ba povu sira.

“Ita hare deit agora Estrada iha bairu hanesan Fatuhada to’o oras ne’e sedauk hetan atensaun maksimu husi ministeriu kompetente. Tamba ne’e mak difikulta transporte publiku inklui privada,”konfesa Adelino.

Hatan kona ba prekupasaun hirak ne’e, SEOP, Domingos Caeiro esplika katak, atu hadia Estrada iha bairu laran depende ba kondisaun Estrada.

Caeiro esplika liu tan katak, to’o agora husi obras publika sedauk iha orsamento atu halo rehabilitasaun ba Estrada iha Dili laran.

“Atu hadia Estrada ka halo rehabilitasaun laos iha tinan ida deit ita halo hotu kedas maibe ne’e tenke liu husi prosesa nia laran,”Caeiro hatutan. Vey
.