DILI-Funsionariu estadu presiza uza kupon mina ho disiplina, hodi fo kontribuisaun ba nasaun. Labele estraga nasaun no hafoer ministeriu nia naran, liu husi atetude abuzu kupon mina ba interese privadu. Tamba kupon mina nee uza povu nia osan, laos osan privadu ema ida nian.
“Uza kupon estadu, ita tenki displina. See ita hakarak kontribui ba nasaun, ita tenki kontribui ho diak. Kuandu hau kaer kona, hau sei la fo perdaun ba ema sira nebee halo hahalok sira hanesan nee,” afirma Vice Ministru Negosiu Estranjeiru, Alberto Carlos ba jornalista iha Dili Convention Center, Eis Merkadu Lama-Dili, Kinta (7/4).
Nia bolu atensaun ba funsionariu nebee servisu ba estadu, kuandu simu kupon husi ministeriu, funsionariu nee iha obrigasaun atu hatama iha lock book. Ense mina litru ida, tenki hakerek iha lock book, setiap kali lao.
Alberto hatutan, ema nebee ense mina ba kareta privadu ho kupon governu nian, ema nee estraga nasaun, estraga povu no estraga ministeriu, tamba osan povu nian, laos osan prividu hodi halo ba interse privadu.
Iha fatin seluk, Deputadu Jose A.F Teixeira husi Fretilin haree katak kupon mina nee laiha kontrolu husi governu. Tanba balun foti tiha kupon, hodi ba faan fali iha fatin sira nebee ema faan mina.
“Lolos nee tenki investiga no auditoria nebee klean ho didiak, tanba ita sidauk hatene ida nee too iha nebee? Kompara ho orsamentu governasaun uluk tempu Fretilin nian nee, ohin loron orsamentu ba mina bele dehan dala 10 boot liu, ida uluk,” tenik Teixeira.
Nunee mos Deputadu Independenti, Mateus de Jesus hateten, tuir nia hatene, kupon mina nee uza ba kareta estadu nian deit. Needuni, nia husu ba sira nebe faan mina, presiza hare numeru kupon nee mai husi departamentu nebee, atu nunee bele halo investigasaun klaru.
“Kupon nee klaru tiha ona hakerek iha nia lolon katak kupon PN nian nee PN nian, kupon husi MS nee MS nian. Kuandu haree kupon nee, hatene kedas katak kupon nee husi departamentu ida nebee,” dehan Mateus.
Entretantu Deputada Getrudes Moniz esplika, mina governu nian nee pertense ba kareta estadu atu halao servisu estadu nian. Kupon nee e laos para atu fasilita fali kareta privadu sira. Nia fo ezemplu, kareta sira nebee iha PN, iha kareta privadu sira hanesan Deputadu Fretilin sira nebee uluk lakohi simu kareta, sira mos simu kupon husi PN. Sira lori karta husi instituisaun katak ida nee ense ba kareta privadu duni, maibe atu halao servisu povu iha rai ida nee. Maibe problema laos foin dadauk akontese, problema nee akontese antes deputadus sira nee hetan kupon husi governu.
“Husu ba governu atu halo invstigasaun ba entidades hotu, funsionariu publiku sira nebee maka simu kupon atu ida-idak iha konsiensia katak ida nee atu uza ba governu, laos atu fasilita kareta privadu hodi ense fali mina estadu nian. Agora nee mina mos karun no ida nee ita kategoriza hanesan korupsaun,” hateten Gertrudes. Lay
.
0 comentários:
Enviar um comentário