Aban, Fretilin Halo Debate Nakloke ho Jornalistas

.

Written by Domingos da Silva - Wednesday, 13 April 2011

CJITL flash, Centru Jornalista Investigativu Timor Leste – CJITL, Kinta feira aban (14/4) sei organiza debate nakloke ida hodi lori partidu Fretilin hasoru malu ho jornalista sira.

Programa ne'e nu'udar aktividade integradu ida husi CJITL nian ba tinan 2011 hanaran “Konhece Ita nia Partidu Politiku.

Tuir Emilia Ana Martires, Chefe Komisaun Organizadora ba eventu seminar nakloke ne'ebe sei hala'o hahu tuku 09.00 dader iha fundasaun oriente ne'e sei debate liu konaba oinsa preparasaun partidu Fretilin ba Kongreso Nasional iha Setembru, kampanye eleitoral 2012 no mos oinsa komitmentu Fretilin atu kopera ho instituisaun demokratiku sira hodi garante stabilidade no unidade ba povu.

Iha Seminar ne'e, oradores sira ne'ebe sei partisipa iha debate durante oras ha'at ne'e mak hanesan; Francisco Branco, Josefa Pereira Soares, Estanislao da Silva, Osorio Florindo, Aicha Bassarewan, Inacio Morreira no Jose Teixeira.

Emilia haktuir katak seminar ne'e sei konta ho partisipasaun jornalista nain 50 resin no mos komisariu sira husi Comisaun Nasional ba Eleisaun – CNE.

Emilia mos haktuir liu tan katak antes ne'e CJITL halo tiha ona seminar nakloke ida seluk ho partidu Conselhu Nasional Rekonstrusaun de Timor - CNRT iha fulan Marcu liu ba no sei iha mos seminar ho partidu sira seluk ne'ebe rejistu ona iha CNE atu kompete iha eleisaun jeral 2012. (Domingos da Silva/CJITL)

.