Tempu Ona PNTL Kaer Poder, SES Labale Monu Ba Manobra Politikus

.
Josefa Parada - Sesta, 18 Marsu 2011 - SUARA TIMOR LOROSAE

DILI—Consellu Nasional Joventudi Timor Leste (CNJTL), fo garante ona katak Polisia Nasional Timor Leste (PNTL), iha kbit atu kaer poder seguransa iha rai laran.

“CNJTL iha nia prinsipiu kedas laiha duvidas bainhira ita iha duvidas ita labele independensia, Tanba ne’e Hand Over ba hau tenke iha, so hau bele rekomenda katak Polisia hanesan GNR ho FPU Malayzia sira bele kuntinua liu husi koperasaun bilateral ne’ebe iha,” hatete Presidente CNJTL, Leovigildo Hornai ba STL iha nia Sede, Farol, Dili, Sesta (18/3).

Nia sujere mos katak, bainhira iha Hand Over husu apoiu ba UNPOL maka presiza atu reforsa deit ba investigasaun no mos iha intelejensia nian, ba parte seluk diak liu bele haruka sira fila tanba la importante.

Parte seluk, Sekretariu Estadu Seguransa (SES), Francisco da Costa Guterres husu ba membru polisia tomak atu hamrik hanesan pilar independente bele proteze populasaun, fo apoiu hodi konsilida demokrasia iha TL.

“Ita bo’ot sira tenke hambrik metin iha instituisaun nia laran, hambrik neutru, tanba oras ne’e iha problema no defikuldade balun sei infrenta ita liliu atu tama ba eleisaun jeral 2012,” hatete SES.

Iha oportunidade ida ne’e, Presidente Komisaun B, ne’ebe toma konta ba Asuntu Negosiu Estranjeiru, Defeza ho Seguransa Nasional, Duarte Nunes informa governu iha ona politika kona ba asuntu UNPOL atu intrega poder ba iha PNTL. Agora hein Hand Over ne’e hotu tiha sira avansa ba prosesu tuir mai ne’e.

“Ami konkorda katak ita tenke konfia ita instituisaun rua PNTL ho F-FDTL atu lao ba oin, tanba ita brani ukun an no barani kaer mesak ita nia defeza ho serguransa iha rai laran, ida ne’e maka importante,” hatete Duarte.

Parte ne’e mos, Komandante Jeral PNTL, Komisariu Longuinhos Monteiro, ba Jurnalista hatete iha 27 Marsu 2011, UNPOL ofisialmente intrega ona poder operasional mai iha komando PNTL. Oscar Salsinha
.