Tempu Badak Governu Soe Fos A’at

.
Josefa Parada - Segunda, 14 Marsu 2011 - SUARA TIMOR LOROSAE

DILI- Inspektora Geral Siguransa Alimentar, Florentina Smith hatete governu liu husi Ministeriu Turismu Comersiu no Industria (MTCI) iha tempu badak sei soe fos marka MTCI ne’ebe a’at hamutuk rihun tolu ba leten sak.

“Fo’os ne’ebe aat iha Armajen Tibar labele fo konsumsi ba povu tanba kondisaun ladiak bele imfaktu ba saude. Oras ne’e governu prepara halo idetifikasaun katak,labele uza tanba governu liu husi MTCI kordena ho PNTL para fos a’at ne’e hakoi deit ona. Ami halo inspeksaun katak fos ne’e labele konsumsi tanba kondisaun ladiak ona bele imfaktu ba saude tanba udan ben kona, soe deit ona,” hatete Smith iha ninia Servisu Fatin, Matadouro, Dili, Kinta (10/3).

Iha parte seluk, Gestor Interino Sancho da Silva hatete relasiona ho fos ne’ebe estraga hamutuk 450 sak iha Armajen Distritu Aileiu, governu sei bolu Kompania Timor Estivadores ne’ebe kaer bele responsabiliza.

Tuir nia, husi 450 sak ne’ebe aat, 120 sak estraga iha roo laran tanba kona bee no 330 estraga tanba kompania ne’ebe tula fos ne’e haliz iha area Tasi Tolu. Tanba ne’e fos labele rai iha armajen laran.

“Governu bolu kompania ne’ebe fos estraga atu bele responsabiliza tanba tuir kontratu sira selu fali fos estraga karik sira responsaliza bele afeita kompania ho governu ba futuru. Ne’eduni iha tempu badak sei bolu kompania bele tur hamutuk atu resolve problema ida ne’e,” dehan nia. jef
.