Kazu Vise PM, Jose Luis Guterres Tribunal Haruka Karta Ba PN

.
Josefa Parada - Tersa, 01 Marsu 2011 - SUARA TIMOR LOROSAE

DILI– Tribunal Distrital Dili, haruka ona karta ida ba Parlamentu Nasional relasiona ho kazu transferensia osan ne’ebe involve Vise Primeiru Ministru Jose Luis Guterres ho ninia kaben.

Karta ne’e hato’o ba Uma Fukun, iha semana kotuk, hodi baixa kedas ba Komisaun I PN ne’ebe trata asuntu regulamentu internu, etika no mandatu deputadus sira.

Iha karta ne’e nia laran, tribunal la husu ba Parlamentu Nasional atu hasai imunidade Vise Primeiru Ministru. “Ita nia Tribunal Distrital Dili haruka ona surat mai hau, la husu Parlamentu Nasional atu hasai imunidade. Ne’ebe, hau moris iha ambiente ida ke komplikadu uiotan,” dehan Prezidente PN, Farnando La Sama Araujo ba jorlanista sira, Segunda (28/20).

Tuir La Sama, karta ne’e hanesan informasaun deit (bersifat informasi) no prosesu ida ne’e konsidera nudar buat foun ida ne’ebe komplikadu tebes. “Hau hare buat ne’e foun, hau koalia nakloke katak difikulta uitoan hau nia vida. Ne’eduni, hau husu ba deputadu hotu atu hare ba konstituisaun. Agora iha obrigasaun oinsa, difisil uitoan tamba votus ne’e konsiensia deputadu idak-idak nian,” La Sama esplika hodi hatutan mos katak Meja Plenaria PN hein relatoriu pareser husi Komisaun I ba kazu ne’e.

Parlamentu Nasional tenta atu rona konseilus husi konstituante sira atu hare ba konstitusaun.

Iha fatin hanesan, Deputadu PSD, Mario Viegas Carrascalão hanoin, kazu Vise PM Jose Luis Guterres hanesan kestaun administrative. Tamba ne’e, loloos julagamentu halo ba kestaun administrativu nian.

“Ita here katak nia (Vise PM Jose Luis, red) kaben hanesan staf lokal, selu fali hanesan polling staf. Ida ne’e mak sala interpretasaun. Ba hau lao’s krime, krime ne’e tuir hau nia hare kuandu ema halo sengaja atu prezudika estadu,” Mario hanoin.

Nia hatutan, kazu ne’e sala administrativu, loloos osan ne’e selu fali ba estadu. Maibe depende ba tribunal atu foti desizaun.

Antes ne’e Vise Primeiru Ministru, Jose Luis Guterres hatete, seidauk hatene loos bainhira mak nia hetan suspensaun husi nia kargu hodi ba hatan iha Tribunal Distrital Dili, Nia mos hatan “hau seidauk hatene”, wainhira jornalista sira husu nia prontu ka lae ba hatan iha tribunal relasiona ho kazu transferensia osan ne’ebe diskonfia nudar hahalok korupsaun.

“Hau seidauk hatene, kuandu hau hatene ba mak hau koalia ba imi (jornalista, red).

Buat sira ne’e kala oras ne’e dadaun iha tribunal ona. Ne’eduni husik ba, kuandu iha ona informasaun mak hau bele koalia ba imi,” Guterres hateten.

Resposta ida ne’e halo jornalista sira tenta nafatin hodi husu karik Vise Primeiru Ministru ne’e mos prontu ba hatan bainhira hetan notifikasaun husi tribunal. Guterres hatan, “Hau la hatene no hau seidauk hatene. Ne’eduni kuandu hau iha ona informasaun mak hau foin bele informa ba imi”.

Nune’e mos Deputada Fernanda Borges husi bankada PUN mos husu kona ba suspensaun ba Ministru sira ne’e bainhira mak atu akontese.

“Hau hakarak husu suspensaun ba ministru sira ne’e bainhira mak atu akontese, se ita koalia iha ne’e dehan ita lakoi korupsaun ita hakarak ba halo KAK, haruka lei ba PN, forma buat sira ne’e maibe to’o loron ikus tama tiha ba iha PGR atu lori ba iha tribunal ita lakoi ba hatan. Ne’eduni bainhira mak ida ne’e atu akontese,”dehan Fernanda.

Karta husi Tribunal Distital Dili ba Parlamentu Nasional baixa ona ba a Komisaun I PN. Karta ne’e simu husi Vise Prezidente Komisaun I, Deputadu Jacob Xavier. Meja PN hein hela relatoiu pareser husi komisaun refere.lay
.