Ekonomia Minimu, Povu Habai A’an

.

Josefa Parada - Tersa, 29 Marsu 2011 - SUARA TIMOR LOROSAE

DILI - Hetan doit metan hodi sustenta familia iha tempu ida agora, susar teb-tebes, ho vida moris nebe karun no kiak kampu servisu, povu rai nee ida-idak tenke fera kakutak liu esforsu makaas hodi asegura sira nia ezistensia iha mundu manas ida nee.

Balu ne’ebe iha kapasidade intelektual naton vida moris diak liu, tanba sira bele asesu kampu servisu provide iha governu no mos ONG Nasional no Internasional.

Maibe, ba hirak ne’ebe uluk laiha posibilidade hetan asesu ba esdukasaun tantu formal no mos informal, agora tenke sai dezempregu, embora oras nee investimentu estranjeiru barak tebes iha TL. Hanesan Jose Maia tenke habai aan iha loron laran, tanba nia laiha posibilidade asesu ba kampu servisu nebe iha.

“Uluk ami hanoin depois ukun aan, bele iha mudansa ba ami nia moris, maibe tinan sanulu nia laran, ami nia vida nunka iha mudansa, ami sente moris nee aumenta klot ba daudauk. Jose Maia hato’o nia halerik ne’e ba STL iha Convention Merkadu Lama, Dili, Segunda, (28/3).

Maia hatete vida moris mak loron fa’an ai-farina iha estrada ninin. Osan nebe nia hetan liu husi negosiu aifarina kuaze la too atu sosa fos lata ida hodi haan loron ida.

Situasaun hanesan mai husi Lucia da Costa. Tuir nia situasaun ekonomia rai nee agora ladun favorese ba timor oan sira, tanba fila liman iha rai laran laos timor oan deit, maibe ema estranjeiru.

Rendimentu hanesan ema fila liman, katak Lucia kiik tebes, loron ida hetan U$20, benefisiu nebe sira hetan la too dolar ida, tanba ema barak mak faan, presu kompetatif, dala ruma sae I dala ruma tun. “Rendementu diak bainhira iha iventu boot ruma, ema barak sirkula iha Dili laran, maibe loro-loron bain-bain, hetan deit U$ 10 loron ida sorti ona.

Nunee mos Jacinto Pereira, hatete tanba nesesidade uma laran, orbiga sira tenke hasiru anin, udan no loron manas. “Se ita la faan sasan, ita atu hetan osan husi saida, agora fasil liu mak fila liman, mas problema ema hotu hakarak fila liman maske funsionariu boot,” tenik Jacinto.

Lamentasaun seluk mai husi, João Menezes. Tuir nia maske loron ida hetan U$20.000, laos problema, importante dapur kontinua suar. “Sorti diak bele ajuda oan sira eskola too universidade.” Vey

.