Ahi Mate, PM Xanana Halai Sai Husi Salaun Enkontru DCC

.
Josefa Parada - Tersa, 15 Marsu 2011 - SUARA TIMOR LOROSAE

DILI- Eletrisidade nebe kontinua mate lakan iha sidade laran, sai preokupasaun ema hotu nian. Akontesementu hanesan akontese horseik Tersa (15/3) iha salaun Enkontru Dili Convention Center (DCC) eis Merkadu Lama.

Ahi mate ne’e akontese bainhira membru governu hotu lansa hela portal transparesnia, nebe lansa husi Primeiru Minstru Kay Rala Xanana Gusmão nebe akompanha husi Minsitra Finansas Emilia Pires, hamutuk ho membru Governu no diretora jeral husi ministeriu sira, membru deputadu balun, ajensia internasional no nasional inklui sosiadade sivil sira.

Hare ba akontesementu ne’e, PM Xanana ho nervosu halai sai husi salaun enkontru ba liur hodi hirus Sekretariu Estadu Eletrisidade Agua no Urbanizasaun (SEEAU), Januario Pereira. Relasiona ho akontesementu ne’e, PM Xanana nebe akompanha husi Minsitru Infrastrutura Pedro Lay, hakarak atu atu hare direitamente servisu kompanhia Manitoba iha EDTL Comoro, maibe la konsege.

Hafoin de minute hirak liu tiha, ahi komesa lakan no lansamentu ba portal tranparensia hahu fila fali ninia ajenda iha sesaun perguntas no resposta. Antes hahu sesaun ne’e, PM Xanana rasik ho hirus hakilar hodi bolu partisipante sira nebe sei halao hela sira nia break.

“ Hau husu favor ida ita tama mai ona, ba sira nebe hamri’ik iha odamatan neba, lori ho imi nia hahan sira ne’e mai han iha laran deit, ita mai iha ne’e laos atu han,” hakilar PM Xanana.

SEEAU Januario Pereira nebe mos marka prezensa iha lansamentu postal tranparenisa ne’e, bainhira hare akontesementu ne’e, labele halo buat ida. Nia rasik preokupa ho telefoni hodi la fo komentariu relasiona ho ahi nebe mate bebeik.

Akontesementu laos deit hasae PM Xanana nia nervosu, maibe Ministra Finansas (MF) Emilia Pires mos nervosu ho ahi nebe mate lakan.

“ Deskupla hau nervosu oituan ho ita nia eletrisidade nebe lakan mate, maibe ita nia sesaun ne’e kontinua nafatin” tenik Emilia.

Maske situasaun ahi mate halo ema hotu preokupa, maibe sesaun perguntas no resposta konaba lansamentu portal transparensia kontinua to’o remata iha tuku 12.30 otl. Josefa Parada
.