Veteranus Fiar Xanana Libertador Povu, Caetano: “Ami Nunka Husik Maun Boot”

.
Josefa Parada - Kinta, 03 Fevereiru 2011 - SUARA TIMOR LOROSAE

DILI — Veteranus Falintil no Antigu Kombatentis libersaun nasional, tula fiar nafatin ba Primeiru Ministru (PM), Kay Rala Xanana Gusmão, atu dedika aan tomak hodi liberta povu ida ne’e husi ki’ak, mukit no atraza.

“Nudar veteranus, ami sempre tau esperansa ba Maun Bo’ot Xanana, ne’ebe desde tempu rezistensia iha ai-laran ho situasaun ida difisil tebes nia infrenta to’o ohin loron ita hetan ukun rasik aan. Tanba ne’e, veteranus sira la duvida ho lideransa Maun Bo’ot Xanana nian atu liberta povu ida ne’e,” afirma L-4 nudar veteranus ida wainhira dada lia ho STL iha Delta Nova, Dili, Tersa (1/2).

L-4 dehan, ho kapasidade no dedikasaun PM Xanana nian ba povu ho rai ida ne’e, bele sai garantia ba povu tomak atu dezenvolve rai ida ne’e ho diak no tuir duni mandamentu ne’ebe eis guereleiru ho saudozu sira tomak mehi durante tempu rezistensia nia laran.

Nudar veteranus, L-4 fiar katak, ho Orsamentu Jeral Estadu (OJE) tinan fiskal 2011 ho montante U$ 1.306,018.000, bele lori dezenvolvimentu povu ida ne’e nian la’o ba oin. Tanba ne’e, governante tomak ne’ebe sai liman-an ba PM Xanana nian bele haka’as aan implementa programa governu nian ho diak tuir duni politika orsamentu estadu tinan ne’e nian.

Buat ne’ebe importante tebes atu kore povu ne’e husi mukit, tuir L-4, governu tenki ejekuta ho responsabilidade OJE tinan ne’e, liu-liu hadia lalais kondisoens infra-estutura baziku, hanesan estradas, ponte, bee mos, eletrisidade, saude ho kondisaun eskola iha nasional to’o area remotas.

Meta Mali, nudar mos veteranus ida sublinha tan, OJE tinan fiskal ne’e bo’ot tebes no tenki bo’ot duni atu bele reforsa komprimisiu PM Xanana nian, ne’ebe nia rasik halo durante funu tinan 24 nia laran.

Meta Mali reforsa tan, komprimisiu ne’ebe PM Xanana prega iha nia vida tomak perente tempu luta nian mai to’o ohin loron ukun rasik aan mak oinsa kore povu husi ki’ak, muda faluk ho oan ki’ak nia vida moris no mos muda veteranus sira nia vida.

“Hau atu hateten mos katak, se muda universalmente povu hotu nia vida iha tinan ida nia laran la fasil. Mas, to’o tempu ruma Xanana sei hatudu duni ninia komprimisiu bo’ot ba povu ida ne’e wainhira nia hetan nafatin fiar husi povu atu governa nasaun ida ne’e,” argumenta Meta Mali.

Meta Mali esklarese tan, nudar veteranus ba libertasaun rai ida ne’e, nia kontinua tau fiar iha PM Xanana atu liberta povu ida ne’e husi nakukun, ki’ak no mukit.

Iha fatin hanesan, Custodio Belo alias Alin Laek fo hanoin katak, buat hotu ne’ebe Parlamentu Nasional aprova iha OJE tinan fiskal 2011 nudar kondisaun ida atu bele fo asistensia ba povu ne’ebe sei moris iha ki’ak, mukit no nakukun laran.

“Hau fiar katak, ho ami nia Maun Bo’ot Xanana ne’ebe lidera funu no halo promesa ba povu iha funu laran katak, primeiru liberta nasaun no segundu liberta povu, sei sai duni realidade,” afirma Alin Laek.

Nia hatutan, lideransa Xanana iha governasaun ne’e bele lori duni hakmatek, paz, estabilidade no dezenvolvimentu ba povu hodi goza produtu independensia ne’ebe sosa ho ruin, ran, no mata wen.

“Hau fiar, ami nia Maun Bo’ot Xanana nudar ema ne’ebe ho esperitu matenek ho forsa rai lulik no matebian Timor nian tuur iha nia leten hodi fo kbi’it nafatin ba nia atu liberta povu iha ukun rasik aan ida ne’e,” hateten Alin Laek. Naran Alain Laek rasik ho nia signifikadu katak, Alin Lakohi Integrasaun.

Caetano Gonzaga dos Santos alias Foching nudar mos veteranus ida hateten, governu ne’ebe PM Xanana mak lidera sei uja OJE ne’e ho didiak atu garante dezenvolvimentu ba povu ho nasaun ida ne’e nian.

Foching esklarese katak, vizaun Xanana nian desde iha ai-laran nia hatene muinto bem, ne’ebe hakarak duni dezenvolve povu ho rai ida ne’e.

“Iha ema ida-rua mak kala dehan, la fiar Xanana, maibe povu sei fiar nafatin Xanana. Ami veteranus rasik mos nunka husik Xanana, tanba ami hatene ninia vizaun politika ba povu ida ne’e diak tebes desde tempu rezistensia nian,” Foching hateten.

Antes ne’e, Vise Primeiru Ministru ba asuntus Sosiais, Jose Luis Guterres iha nia lia kmanek ba lansamentu Consorsium Contractor de Eletrisidade afirma katak, Xanana nudar eis komandante gerileirus ba libertasaun nasional hatudu duni ninia dedikasaun hakarak hatur paz, estabilidade no dezenvolvimentu ba povu ida ne’e.

Jose Luis dehan, desde simu knar lidera governasaun iha 2007, Xanana hatudu duni ninia kapasidade no karisma hodi hatur no garantia estabilidade ba povu ne’e.
Nia hatutan, PM Xanana mos komesa hatudu dau-daun ona sinal dezenvolvimentu ba povu, liu-liu oinsa fortifika ekonomia povu nian nai-naik maibe bei-beik.

Jose Luis argumenta katak, Xanana hanesna lider rezistensia ida ne’ebe sai Primeiru Ministru diak liu kompara ho Primeiru Ministru seluk-seluk iha mundu ne’e.

“Ita luta para lori paz no moris diak ba povu tomak. La bele familia ida ka grupu ida deit mak riku iha rai ida ne’e,” Jose Luis afirma hikas. sel
.