Tinan 10 Fatumea Moris Nakukun

.
Josefa Parada - Tersa, 22 Fevereiru 2011 - SUARA TIMOR LOROSAE

FATUMEA — Komunidade Sub Distritu Fatumea, Distritu Covalima, oras nee seidauk hetan naroman eletrisidade, maske tinan 10 Timor Leste haksumik aan hanesan nasaun Independente.

“Fatumea hahu husi governu anterior to’o governu Aliansa Maioria Parlamentar (AMP), kontinua nakukun,” Administrador Distritu Fatumea, Martinho Pires, informa preokupasaun hirak nee wainhira partisipa iha seremonia inagura¬saun Sentru Informasaun, Aldeia Tradugama, Suku Nano, Sub Distritu Fatumea, Sesta (18/2).

Ministru Ekonomia no Dezenvolvementu (MED), Joao Goncalves halo vizita especial ba sub distritu Fatumea, Distritu Kovalima, hodi sorumotu ho komunidade.

Administrador sub Distritu Fatumea nee informa katak Fatumea iha ona uma EDTL, nebe hetan ona rehabilitasaun, maibe laiha eletrisidade, tanba nee komunidade Fatumea kontinua moris Nakukun laran.

Iha biban nee Xefe suku Nanu, Venansio Madeira, husu governu AMP atu tau matan Infra-Estrutura fatumea nian liu-liu Eletrisidade no mos Estrada.

“Preokupasaun ba ami maka, asesu ba Estrada no mos eletridade, to agora ami nia oan sira atu estuda iha kalan ladiak, tanba laiha ahi, durante ne’e ami uja deit ahi kami, ida ne’e mos bele fo impaktu ba nia saude,” tenik Venancio.

Responde preokupasaun MED João Gonsalves hatete katak, nia sei informa asuntu ida ne’e ba iha Ministeriu Kompatente iha reunia konselu Ministru. “Kestaun ne’ebe imi preokupa ne’e hau sei lori ba hato iha konselu ministru no mos ba iha ministeriu kompatente, tanba asuntu ida ne’e laos hau nia kompetensia,” informa MED.

Iha oportunidade ida ne’e, komunidade Fatumea, Venancio hatete mos katak sira durante tinan sanulu ona nunka hetan ahi naroman, maibe governu rai nee nunka tau matan. “Ahi ne’e maka importante ba ami, bainhira buat rua ne’e iha ona maka ami nia moris bele kompletu no dezenvolve ekonomia iha ami nia rai bele lao, maibe durante ne’e ami nia moris hanesan iha infernu,” nia hatete. car
.