Seguransa Rai Laran Problematiku, F-FDTL Prontu Kolabora ho Komunidade

.
Josefa Parada - Kinta, 24 Fevereiru 2011 - SUARA TIMOR LOROSAE

DILI – Situasaun seguransa iha rai laran komesa sai preokupasaun ema hotu nian. Komunidade barak mak trauma wainhira hare konfrontu entre joven sira iha bairo laran. Tuir Komandante Jeral F-FDTL, Maior Jeneral Taur Matan Ruak, kazu hirak ne’e mosu ho tendensoens oi-oin. Balun dehan problema rai, balun dehan problema arte marsiais, problema geng nomos problema dezempregu.

Nia rasik konsidera katak problema seguransa nee komesa sai ona preokupasaun ema hotu nian. Tanba nee, nudar instituisaun estadu nian ne’ebe toma responsabilidade ba kestaun nee, F-FDTL hala’o ona inkontru ho Sekretariu Estadu Defeza no Seguransa hamutuk ho Komandante Polisia Nasional Timor-Leste (PNTL) hodi analiza situasaun refere.

Bainhira analiza hotu tiha situasaun, Taur hatuatn, karik iha medidas ruma maka sira sei foti tuir lei ne’ebe iha. F-FDTL hamutuk ho instituisoens relevantes seluk, sei koopera ho komunidade, halo diskusaun hamutuk, atu nune’e bele hatene lo-loos kauza husi problema hirak ne’ebe oras nee mosu iha komunidade nia leet.

“Ami foin dadauk ne’e iha reuniaun ida, analiza uitoan situasaun, no foti ne’e hanesan preokupasaun. Se iha medidas ruma ke persiza ita lao, kontaktu ho populasaun, involve sira iha diskusaun, ita bele hatene lolos kauza problema ne’e saida,” Matan Ruak hateten ba jornalista sira, hafoin hala’o inkontru semanal ho Prezidenti Republika, Jose Ramos Horta iha Palacio Prezidenti Nicolao Lobato, Kuarta (23/02).

Hatan kona ba objetivu husi inkontru ho PR Horta, Taur hateten, ne’e hanesan inkontru semanal, hodi mai hato’o situasaun rai laran nomos aktividade F-FDTL nian ba Xefi Estadu.

Kestaun seguransa iha rai laran mos sai preokupasaun ba deputadu sira iha Uma Fukun Parlamentu Nasional. Foin lalais ne’e, Deputadu Aderito Hugo da Costa husi Bankada CNRT informa katak kondisoens nebe Parlamentu Nasional ejiji maka tenki halo seguransa makaas, tanba atividade krime homesidu oras nee dadaun akontese hodi rezulta ema mate.

Deputadu ne’e rasik sei duvida, motivu saida maka akontese oho malu no konflitu bebeik iha bairo-bairo, la hatene loos atividade durante ne’e keta iha unsur politika ka motiva politika ruma karik. Tanba nee husu ba polisia atu halo investigasaun.

“Hau kestiona kontrolu seguransa nian maka la para, nune’e polisia tenki halo investigasaun no identifika loloos,” Aderito hateten. Par
.