PR Iha Kompetensia Lori OJE 2011 Ba Tribunal Rekursu

.
Tuesday, February 8th,2011 - TimorExpose

Dili – Parlementu Nasional liu husi deputadu Vital dos Santos husi Bloku Aliansa Maioria Parlamentar ka Bandaka PD hateten Presidente Republika José Ramos Horta iha kompetensia atu lori Orsamentu Jeral Estadu ba Tribunal Rekursu.

“OJE 2011 ne’ebe PN ne’e aprova ona iha 28/01 liu ba depois hato’o ba PR atu promulga mais molok PR uza ninia kompetensia atu husu fiskalizasaun abstrata ba TR hodi husu opiniuan husi TR kona ba inkonstitusionalidade husi lei OJE ba 2011 ne’ebé PN aprova,”dehan Vital Iha PN tersa ne’e (08/02) relaiona ho OJE 2011 ne’ebé PR Horta lori ba Tribunal Rekursu iha segunda ne’e.

Vital hatutan desizaun ne’ebé PR Horta halo ne’e normal tamba uza kompetensia konstitusional.

“Hau hanoin PR uza ninia kompetensia konstitusional ne’ebé mak fó ba nia, ne’e ami hare katak buat ida normal,”haktuir Vital

Tuir Vital bankadaPD sente admira tamba orsamentu dala hitu ne’ebé maka liu tiha ona maibe PR nunka uza ninia kompetensia konstitusional hodi husu TR halo fiskalizasaun maibe ba lei ida ne’e lei OJE 2011 ninian so uniku ida maka PR uza ninia kompetensia atu husu TR atu halo fiskalizasaun.

“Hau hanoin publiko akompanha ona kestaun ne’ebé maka sai preokuapsaun husi bankada opozisaun durante diskusaun orsamentu jeral ne’e maka sira foti kestaun ida OJE 2011 foti husi fundu mina rai eksede husi 3 %,tamba kestaun ida ne’e maka PR husu fiskalizasaun ba TR nomos kriasaun fundus espesiais ne’e, iha buat rua ne’e,”afirma deputadu husi bankada PD ne’e.

Vital dos Santos haktuir relasiona ho ne’e laiha presegisaun politika maibe PR tenta uza ninia kompetensia atu hatur lei ne’e iha ninia fatin.

Governu PN no se deit bele halo interpretasaun ba lei hodi nune’e sira implementa lei, finalmente TR maka uniku orgaun as liu atu halo fiskalizasaun abstrata ba kompreimentu lei ida ba lei seluk, harmonizasaun lei ida ba lei seluk,informa Vital.

Hau hanoin deserteza bele implika maibe la’e tamba OJE 2011 seidauk promulga, lei orsamentu seidauk bele tama em vigor seidauk bele ezekuta, durante prosesu ne’e konserteza governu hala’o deit hanesan kusta-kusta rutina,bens de servisus no governu foti husi duodesimu ne’ebé maka rezerva maibe orsamentu ne’ebé aprovado husi PN ne’e seidauk bele foti tamba seidauk promulga,dehan Nia.

Iha tempu hanesan deputadu Riak Leman husi Bankada PSD hateten kopetensia tomak iha PR Horta nia liman atu halo fiskalizasaun ba OJE ne’e.

“PN ne’e aprova tiha ona orsamentu no haruka ba PR no uza nia poder tomak para haruka ba TR ne’e depende ona ba nia,hau hanoin PR haruka ba TR kompetensia ninian,”dehan Riak.

Deputadu Riak husu ba PR atu promulga lalais orsamentu ne’e hodi bele responde lalais prokupasaun povu nian iha base.

“Orsamentu ne’e maka la hala’o serbisu ruma ba ita nia povu kosertesa situasaun ne’e bele sai ladiak,maibe hau hanoin TR mos sei hala’o apresiasaun, ne’e illegal ka kontra kostituisaun ou la kontra ne’e ida ne’e kompetensia TR nian atu dehan,se OJE ne’e maka demora, sei la implementa se maka terus povu ne’e maka terus duni, povu ne’e maka susar duni, tamba ne’e maka nai ulun sira tenke estuda didiak ba atu halo oinsa para bele resolve povu ninian problema,”hatutan Riak.

Entretanto deputadu Pedro Martires husi bankada CNRT hateten Lei fo dalan ba PR atu lori ba ne’ebé deit maibe tenke hare ba tempo ezekusaun orsamentu nian. (TE)

.