“ Lider ou Kualkuer Sidadaun Tenki Respeita Justisa "

.
LIAN MAUBERE - 18 de Fevereiro de 2011

Xave atu Hametin Pas Estabilidade Iha Timor Leste maka, “Lider ou Kualkuer Sidadaun Tenki Respeita Justisa”

Ita moris iha estadu direitu demokratiku, estadu ida neebe iha konstituisaun no leis atu regula ita hotuhotu nia komportamentu.

Nee signifika katak ita hotuhotu tenki halao knaar nudar orgaun soberania neebe ita tur tuir lei, tuir konstituisaun. Hau temi dala ida tan, ita hotuhotu tenki halao ita nia knaar tuir lei, tuir konstituisaun,” koalia Xefe bancada FRETILIN deputadu Aniceto Giuterres iha PN Kinta (16/12).

Hori uluk kedas, FRETILIN nudar partidu sempre hatudu nia vontadi no preokupasaun atu halao nia knaar iha governu, iha parlamentu ka iha neebe deit iha ita nia estadu nia laran, ho responsabilidadi maxima no respeitu maximu ba lei no konstituisaun, atu hametin ita nia moris nudar nasaun ho estadu de direitu demokratiku neebe forte.

Tamba se ita la halau ita nia servisu, la halau ita nia knaar nudar deputadu, nudar parlamentu, nudar governu, nudar prezidenti republika, ne’ebe tuir lei no konstituisaun, entaun ita laos ona estadu de direitu, nune’e responsaveis maximu politiku sira hatudu dalan ba ita nia sidadaun baibain mos, atu sees aan husi lei ho rezultadu katak ita laos ona estadu de direitu demokratiku.

Nunee ita tama ona dalan ba ditadura, hanesan iha tempu Suharto nian. Karik balun iha ita nia leet hakarak duni atu fila ba tempu neeba, tamba idaidak bele halo tuir nia hakarak, no tuir nia bele subar, no tuir nia bele nauk diak liu ema seluk, no la respeita lei. Tendensia iha tinan tolu liu ba mak atu halo nune duni.

Lakoi preokupa ba leis, ba konstituisaun, halo deit hanesan idaidak nia hakarak. Maibe ita nia povu lakoi politiku sira halo hanesan nee, no FRETILIN sei la husik ita nia rain tama fali ba dalan ida nee.

Timor Leste ne’ebe ukun an iha tinan 8 nia laran ona maibe lider barak mak seidauk respeita justisa no hakat liu desizaun Tribunal.

Tan ne’e Partidu FRETILIN iha Uma Fukun Palramentu Nasional husu atu lider hotu-hotu tenki respeita justisa hodi hametin pas no estabilidade.

“Respeita lei no konstituisional mak sei hametin ita nia estabilidade no paz, nune’e ba ami FRETILIN husu lider hotu-hotu hatudu respeita ba instituisaun justisa, maski sira deside kontra tuir ida-idak nia hakarak ka interes.Tanba ne’e xefe Bancada Aniceto Guterres ne’e dehan, Timor oan hotu-hotu tenki husu ba orgaun soberanu hotu atu respeita instituisaun justisa hodi bele hametin pas no estabilidade iha Nasaun direitu demokratiku.

“Ita hotu husu ba Instituisaun no orgaun soberanu hotu-hotu, ita tenki tau an iha kontestu ida ne’ebe ita dehan estadu de dereitu demokratiku,”dehan Aniceto.

Maske iha tinan 8 nia laran Timor Leste moris indepedensia hanesan nasaun soberanu direitu demokratiku, maibe dala barak akontese lider hakat liu desizaun ne’ebe fo ameasa ba estadu direitu demokratiku, tuir konstituisaun,”komenta xefe bancada.

Maske nune’e deputadu Aniceto hateten, FRETILIN no sidadaun hotu hotu preokupa make lideranca nasaun ne,e nian balu la kumpri desizaun tribunal no la fiar konstituisaun Republika ne’ebe hafraku justisa Iha Timor Leste.
.