Konsolida-An iha Covalima, PSD Optimista Manan Eleisaun 2012

.
Josefa Parada - Segunda, 21 Fevereiru 2011 - SUARA TIMOR LOROSAE

COVALIMA – Partidu Sosial Demokrata (PSD) fiar an atu manan iha eleisaun jeral 2012. Optimista ne’e mosu wainhira partidu ne’e halo konsolidasaun iha sub-distritu tolu ne’ebe pretense ba Distritu Covalima.

Konsolidasaun ne’e rasik hala’o liu husi tomada de posse ba membrus estrutura PSD nian iha Sub-Distritu Fatumea, Zumalai no Fohorem. Programa ne’e hala’o direitamente husi Vise Prezidente PSD, João Gonçalves ho Sekretariu Jeral PSD, Marito Magno, durante loron tolu, hahu husi Sesta (18-20/2). Serimonia tomada de posse ne’e partisipa husi Membru Parlamentu Nasional, Tara ho Maria Paixao, no sai testamunha husi Amu Paroko Zumalai.

Vise Prezidente PSD, João Gonçalves iha serimonia tomada de posse hateten, liu husi konsolidasaun estrutura ne’ebe hala’o husi aldeia to’o sub distritu, ninia objetivu mak atu prepara ema ba eleisaun 2012. Nia fiar katak, ba futuru PSD sei sai buras diak liu tan, tanba partidu balun mai husi Indoenzia, Australia, no mos Portugal prontu ona atu fo kapasitasaun ba membru PSD.

“Ami prepara imi, tanba imi maka futuru nasaun ida ne’e. Ne’eduni hau husu imi tenke prepara an atu sai lider ida ne’ebe diak, atu bele sai membru parlamentu no mos sai membru governu iha futuru oin mai,” Gonçalves hateten.

Iha oportunidade ida ne’e, Membru PN husi Bankada PSD, Tara informa mos katak, liu husi programa tomada de posse no mos reajustamentu husi partidu ida ne’e, atu reforsa no haburas demokrasia iha rai laran hodi defende ema ida-idak nia direitu.

“Karik partidu seluk mak hakarak partisipa no hakarak atu hamutuk ho ita, dalan nakloke ba nia. Sira hakarak mai rona deit mos PSD la bandu, tanba ami hakarak haburas diak liu tan demokrasia liu husi dutrina partidu ne’e nian,” Tara dehan.

Tuir Tara, luta partidu ne’e nian laos atu halo funu. Uluk maka povu hamutuk ho Falintil luta ba ukun rasik an, maibe agora atu halo funu ba dezenvolvementu ba ema nia moris, no mos povu ida ne’e atu bele sente saida maka ukun an.

“Ami nia politika uluk ba ukun rasik an, agora hau hamutuk ho PSD atu halo politika ba dezenvolve ita nia rai no ita nia an rasik, no mos povu ida ne’e,” nia esklarese.
Tuir mai, Sekretariu Jeral PSD, Marito Magno iha nia deskursu informa katak agora PSD komesa prepara nia ema ba iha eleisaun 2012. Ho preparasaun ida ne’e hala’o hodi bele hetan susesu ba iha eleisaun oin mai.

“Ami laos atu buka susesu deit ba iha eleisaun 2012. Maibe iha 2017, ami sei hetan vitoria bo’ot atu kaer ukun. Tanba agora ita sei hasoru hela maun bo’ot ida ne’ebe uluk liberta povu ida ne’e. Ita labele nega nia favor, hodi nia maka to’o ohin loron ita ukun rasik an,” nia esplika.

Ne’eduni liu husi estrutura ne’ebe agora prepara ne’e hanesan futuru, karik 2017 iha eleisaun jeral nia sente PSD sei manan bo’ot liu tan. Ne’eduni agora prepara ona sira ne’ebe tuur iha estrutura, hodi bele prontu kaer governu iha futuru. “Agora lina politika ne’ebe halao dadauk maka ita halao reajustamentu husi 2009. Ita tenki kompleta ita nia estrutura, ita sei tama ba iha aktividade bo’ot, bainhira prepara hotu ona ita bele kaer governu iha 2017,” nia tenik.

Aproveita biban ida ne’e, Presidente PSD Distritu Covalima, Martinho Amaral haktuir, partidu ida ne’e hametin ona nia estrutura hahu husi lorosae too loromonu. Iha Distritu Covalima rasik estrutura PSD komesa husi nivel distritu ba too aldeia.

Tanba ne’e maka agora dadauk fo ona posse ba iha Kordenador Partidu nian iha Sub Distritu Zumalai, Fatumea, ho Fohorem.

Nia esklarese, partidu ida ne’e hari ho identidade disiplina no responsalbilidade. Nia membru mos tuur iha governu. Signifika katak ba oin kadeira sei aumenta bo’ot liu tan iha Parlamentu Nasional, no mos iha governu.

“Ne’eduni husu ba ita bo’ot sira atu kapasita an, karik imi iha duni kapasidade no esforsu makaas atu halao duni programa partidu nian iha Distritu Zumalai, ita bo’ot sira fo dezenvolvementu ba rai ida ne’e,” nia enkoraja.

Relasiona ho programa konsolidasdsaun PSD nian, Administrador Sub Distritu Zumalai iha serimonia ida ne’e promote, atu prontu simu partidu ne’ebe deit maka halao nia programa iha Zumalai. Nia sei la halo diskriminasaun ba partidu tomak, importante maka bainhira programa partidu nian atu hala’o, tenke iha kordenasaun no fo koinesementu ba autoridade lokal.

“Importante partidu hotu tama iha Zumalai ho kalma. Ida ne’e mak hau hakarak fo hanoin ba iha estrutura partidu tomak. Ohin militante partidu balun afilia ba iha PSD. Ida ne’e direitu sidadaun ida-idak nian. Hau la taka matan ba partidu hotu. Odamatan nakloke ba ema tomak, importante maka imi labele halo provokasaun no sadik malu,” nia fo atensaun. Car
.